Per 24 novas rodas che vegnan atgnamain strusch pli producidas ha la Viafier Retica chattà ina furnitura. L'interpresa Stadler Stahlguss SA a Bienna fabritgescha ils tocs necessaris per che las duas locomotivas crocodil possian puspè viagiar senza problems, declera la pledadra da medias Yvonne Dünser envers il Schurnal Regiunal Grischun da SRF.
Per quella empustaziun ha la Retica dentant stuì avrir fitg la bursa: 100'000 francs custan ils tocs da remplazzament. Tenor Yvonne Dünser èn quests daners dentant bain investì:
Quels crocodils han in'attracziun speziala ed i dat blers fans.
E tschancuns nua ch'ils dus crocodils vegnan en funcziun dettia er avunda: savens cumbinads cun vaguns istorics sco il tren regiunal tranter Tavau e Filisur u in zic pli luxurius cun in vagun da salon tranter San Murezzan e Tavau.
-
Bild 1 von 6. Il crocodil electric 404 a Mustér l'onn 1912. Bildquelle: nossaistorgia.ch.
-
Bild 2 von 6. Il crocodil «Ge 6/6 l (406)» cun ina cumposiziun da vaguns da Pullmann sin via encunter Sumvitg l'onn 1979. Bildquelle: nossaistorgia.ch.
-
Bild 3 von 6. Il crocodil 404 alla staziun da Trun l'onn 1980. Bildquelle: nossaistorgia.ch.
-
Bild 4 von 6. Il crocodil ha era gidà da bittar naiv sin il Pass dal Bernina. Bildquelle: Viafier retica.
-
Bild 5 von 6. Bildquelle: Viafier retica.
-
Bild 6 von 6. Il crocodil cun chars da Pullmann datiers da Fideris. Bildquelle: Viafier retica.
Per far ir quels trens vegls na sto dentant betg mo la tecnica constar, mabain er il persunal. Locomotivists e locomotivistas che san manar ils crocodils na dettia betg en abundanza:
Qua ston ins avair blera savida. A Landquart scolain nus a posta persunas uschia ch'ellas pon far il mantegniment da quels vehichels istorics.
Per pudair viagiar cun ils trens da nostalgia da la Viafier Retica na ston ins betg cumprar in bigliet spezial. Quai vala era per ils viadis cun las duas locomotivas crocodil che vegnan – suenter lur restauraziun – puspè ad esser pinadas per novas aventuras.