Cumenzà sia carriera diplomatica ha Chasper Sarott il 2010, quai suenter la matura a Cuira, in studi da dretg a Turitg ed a Berlin e pliras autras incumbensas. Durant ils ultims onns ha Chasper Sarott pudì represchentar la Svizra en pliras funcziuns en l'exteriur.
Tranter auter il 2014 sco emprim collavuratur en l'ambassada a Beirut en il Libanon e dal 2017 a Varsovia en la Pologna e lura dal 2019 sco ambassadur a Madagascar e dal 2022 en la Republica Democratica dal Congo. Da manar la Lia Rumantscha poss'ins cumparegliar da la grondezza ennà cun ina abassada en l'exteriur – a Congo ha el per exempel manà 30 persunas. La Lia Rumantscha ha enturn 20 collavuraturs e collavuraturas – ma sco president da la Lia na vesa Chaspar Sarott sasez betg memia bler en il operativ.
Chasper Sarott pendulescha sco schef dal persunal dal Departament federal d'affars externs per il mument tranter Berna e sia patria Sent. En questa funcziun è el responsabel per var 5'500 emploiadas ed emploiads sparpagliads sin tut il mund. A Berna saja el mo per lavurar, durmir e far la duscha – el emprova da passentar uschè bler temp sco pussaivel a Sent.
Jau mangel quatter giadas l'emna tschaina en Engiadina.
E tuttina passenta el era bler temp a Berna. Sin la via tar la lavur passa Chasper Sarott sin il martgà davant la Chasa federala. El cumpra in satg apricosas vallesanas. E cun la marenda enta maun va el en direcziun biro, che sa chattà en la ala laterala da la Chasa federala.
Las experientschas ch'el ha sco diplomat pudess era esser in avantatg per ses post futur. La pli bella part da la diplomazia saja ch'ins possia discurrer cun tuts. E ch'ins saja bun da surdar messadis pli difficils en ina maniera chapibla.
Il rumantsch è adina in bun punct per cumenzar la discussiun.
Chasper Sarott raquinta ch'el ha surtut candidà per il presidi da la Lia Rumantscha per dar als delegads e delegadas ina schelta, pia ch'els pon tscherner tranter in co-presidi ed in presidi singul ed era avair ina differenta generaziun. El vul gidar a la Lia cun ses sguard da dadora e purtar stabilitad. E tuttina ha el ina pluna respect da questa carica – ma Chasper Sarott sa legra. Per avair avunda temp per la Lia Rumantscha reducescha el ses pensum tar il EDA, il departament federal d'affars exteriurs.