Suenter controllas da rutina da l'Assicuranza d'edifizis dal Grischun (GVG) rinforza la citad da Cuira tar las scolas l’obligatori da sa tegnair vi da las prescripziuns da fieu. Diversas scolas han ussa in problem: ellas ston reducir considerablamain il dumber da visitaders che dastgan esser preschent il medem mument en l'aula – ina gronda sfida, sch'i va per organisar tschertas occurrenzas.
Be pli 50 persunas èn lubidas
Pertutgada da questa midada è tranter auter la Scola professiunala dal Grischun – la pli gronda scola dal chantun Grischun. En lur aula dastgan da nov maximalmain 50 persunas esser preschentas, perquai ch’i dat mo ina sortida d’urgenza. Pliras occurrenzas, sco per exempel las festas da diplom u bals da scola, na pon pia betg pli avair lieu là sco fin qua.
Nus na pudain praticamain realisar naginas occurrenzas pli.
En general èn aulas da scolas savens il lieu da sa scuntrar, saja quai per preschentaziuns da teater, concerts u radunanzas communalas. Cun la nova limita da visitaders e visitadras dumber èn pliras da quellas occurrenzas ussa dentant franadas.
«Nus na pudain praticamain realisar naginas occurrenzas pli», di Martin Good, directur da la Scola professiunala artisanala da Cuira. Ina festa da diplom dal venderdi stoppia per exempel vegnir planisada enturn. Ed er ulteriuras occurrenzas internas stoppian vegnir fatgas da nov insanua extern.
Prest tut las scolas da Cuira pertutgadas
Ma la Scola professiunala dal Grischun n'è betg la suletta che stat davant novs obstachels cun quest nov obligatori. En tut 18 da las aulas da scola a Cuira èn pertutgadas – quai èn pia bunamain tut las scolas a Cuira che ston reducir cleramain lur dumber da visitaders. Ma atgnamain avessan bleras da las sutgas en las aulas, ch'i dat per part gia dapi decennis, gia dapi in lung temp stuì restar vitas.
-
Bild 1 von 7. Bunamain tut las aulas da scola a Cuira vegnan en l'avegnir a stuair restar cleramain pli vitas che fin qua – per part schizunt be pli la mesadad dals visitaders e las visitadras ch'eran uschiglio savens preschents. Bildquelle: RTR.
-
Bild 2 von 7. Decisiv per il dumber da visitaders ch'è lubì en ina aula da scola èn las sortidas d’urgenza, ma quellas paran d'esser plitost fitg limitadas en bleras scolas. Bildquelle: RTR.
-
Bild 3 von 7. Quai è era il cas tar la Scola professiunala dal Grischun – la pli gronda scola dal chantun Grischun. Cun la limita da be 50 visitaders e visitadras stat quella davant ina pulita sfida areguard l'organisaziun da diversas occurrenzas. Bildquelle: RTR.
-
Bild 4 von 7. Events pli gronds, sco festas da diplom, concerts u ulteriuras occurrenzas internas stoppian da nov avair lieu insanua extern. . Bildquelle: RTR.
-
Bild 5 von 7. Ma la Scola professiunala dal Grischun n'è betg la suletta che stat davant novs obstachels cun quest nov obligatori. Bildquelle: RTR.
-
Bild 6 von 7. 18 da las aulas da scola a Cuira èn pertutgadas... Bildquelle: RTR.
-
Bild 7 von 7. ..e ston ussa tschertgar novas soluziuns. Bildquelle: RTR.
L'Assicuranza d'edifizis dal Grischun (GVG) punctuescha, che questas prescripziuns per la protecziun en cas d'in fieu na sajan betg sa midadas ils ultims onns. Da principi sajan questas u sumegliantas limitas da capacitad gia vegnidas fixadas tar anteriuras controllas. Il president da la citad da Cuira, Hans Martin Meuli, conceda che las limitas fixadas na sajan probabel savens betg vegnidas resguardadas en cas d'occurrenzas pli grondas.
Ussa veglia la citad dentant rinforzar las prescripziuns da visitaders e visitadras en las aulas a moda pli consequenza. Dapli davart pussaivlas negligientschas en il passà na vul Hans Martin Meuli betg dir – era perquai ch'el saja pir dapi in onn en uffizi. La citad e las scolas tschertgian ussa soluziuns per l’avegnir. Igl restan dentant bleras dumondas avertas.