Regenza sto instradar mesiras per segirar Via da Calanca
La regenza Grischuna sto instradar mesiras per segirar la via da Calanca. Quai ha il Cussegl grond decidì gist avant che la sessiun dal favrer è ida a fin. Ella duai incaricar l'Uffizi da construcziun bassa d'instradar la planisaziun e construcziun da gallarias necessarias per segirar la Via chantunala. Cunzunt là nua ch'autras mesiras da segirar la via èn fin uss stadas insuffizientas. Gist la fin d'emna passà è la via puspè stada serrada pervia da la ferma plievgia.
La regenza aveva proponì da midar l'incumbensa uschia ch'ella avess mo stuì examinar ulteriuras mesiras da segirtad sco per exempel gallarias, tunnels u raits cunter crudada da crappa. Il Cussegl grond è dentant sa decidì per la varianta pli lianta e quai unanimamain.
Andri Perl va sin viadi enturn il mund
Il president da la partida socialdemocratica dal Grischun Andri Perl ha annunzià a la fin da la sessiun dal favrer ch’el sa retiria sco deputà, quai suenter prest 10 onns en il Cussegl grond. El sa retira er sco president da la partida – lezza elegia sonda che vegn sia successura, proponida vegn Julia Mülller. Er ella è deputada en il Cussegl grond.
Plan da regenza 2025-2028
Il Cussegl grond ha tractà il program da regenza 2025-2028. Quel vala sco mussavia cun accents e finamiras politicas per ils proxims quatter onns. Ils deputads e las deputadas han discutà davart quel e la finala prendì per enconuschientscha. Plinavant ha il Cussegl grond er approvà il plan da finanzas per ils proxims quatter onns. Quel prevesa deficits e da duvrar reservas da l'agen chapital.
Derschadras e derschaders saramentads
Las autoritads per la nova Dretgira superiura dal Grischun èn vegnidas saramentadas en il rom da la sessiun da favrer. A partir dal 2025 lavuran las duas dretgiras en il Grischun (Dretgira chantunala e Dretgira administrativa) sut in tetg en la Dretgira superiura. Elegids per la perioda d'uffizi èn 14 commembras e commembers. President da la nova Dretgira superiura è Remo Cavegn, vicepresident Thomas Audétat.
L'avertura da la sessiun
Il president dal Cussegl grond Franz Sepp Caluori ha entant survegnì sustegn d'intelligenza artifiziala. Cunquai ch'el è stà en sia funcziun sco pli aut Grischun al WEF a Tavau, è el vegnì attent sin quai che l'intelligenza artifiziala è stà il grond tema. Quai ha inspirà el per ses pled d'avertura ch'el ha bain scrit sez, dentant laschà performar d'in avatar da sa sez digital. El ha laschà mussar in video da quest avatar ch'ha fatg il pled en diversas linguas.
En il rom da quest pled ha Franz Sepp Caluori fatg attent sin las pussaivladads che l'intelligenza artifiziala porschan – dentant er sin ils ristgs. El ha perquai appellà a deputadas e deputads da daventar activs e da gidar a far or da la intelligenza artifiziala in motor per midadas positivas dentant er da proteger las valurs e la qualitad da viver.
Martin Bettinaglio daventa president da fracziun dal Center
La fracziun da l'Allianza dal Center en il Cussegl grond survegn cun Martin Bettinaglio in nov schef. Fin uss ha il deputà da Claustra manà la fracziun ensemen cun Reto Crameri. A partir dal prim da mars surpiglia el sulet il presidi da la fracziun. Quai ha la partida communitgà. Reto Crameri vegn vinavant a restar en la suprastanza da la fracziun.
Cun 34 deputadas e deputads è la fracziun da l'Allianza dal Center la pli ferma en il Cussegl grond grischun.
