Siglir tar il cuntegn

Header

cuntegn

Per ils onns 2025-2028 Program da regenza e plan da finanzas è sut tetg

Il Cussegl grond ha tractà il program da la regenza dal 2025-2028, pia las finamiras politicas per ils proxims quatter onns. Il plan da finanzas per ils proxims quatter onns ha il Cussegl grond approvà unanimamain.

Il plan da finanzas per ils onns 2025-2028 prevesa deficits per il chantun Grischun, il 2027 il pli aut cun bunamain 168 milliuns francs deficit. Raschun per las cifras cotschnas sajan custs che creschan en il sectur social e da sanadad, pli paucas entradas da taglia pervia dal sbassament dal pe da taglia chantunal e tut tenor pli paucs daners or da la gulivaziun da finanzas sco er pli paucs daners da la Banca naziunala svizra. Grazia a las reservas d'agen chapital possia il chantun far frunt a las sfidas finanzialas che spetgan, ha declerà il minister da finanzas Martin Bühler. Er la maioritad da la cumissiun responsabla sco er dal Cussegl grond è la finala suandada las propostas da la regenza. La fracziun socialdemocratica avess gugent schluccà la regla da pudair far dapli che 50 milliuns deficit grazia a l'agen chapital. Questa proposta n'ha dentant gì nagina schanza.

audio
Plan da finanzas chantun 2025-2028
ord Actualitad dals 13.02.2024.
laschar ir. Durada: 2 minutas 57 Secundas.

Transfurmaziun digitala ed in chantun attractiv e persistent

La gronda tractanda da la sessiun da favrer è il program da la regenza per ils onns 2025 – 2028. Quel definescha ils temas da pais, finamiras e mesiras politicas per ils proxims quatter onns per il Grischun. En tut èn quatter temas da pais definids:

  • transfurmaziun digitala
  • lavurar e viver en il Grischun
  • clima ed ambient
  • in Grischun attractiv

Sin basa da questas quatter pitgas ha la regenza definì 11 finamiras per il chantun Grischun, ch'il Cussegl grond ha tractà e pendì per enconuschientscha il mardi avantmezdi. Temas sco il spazi d'abitar, purschidas da scolaziun e furmaziun ma er la mobilitad han dà da discutar.

Discussiuns animadas davart il traffic public hai dà per raschuns actualas, suenter che la Viafier retica ha dà enconuschent ses plans da remplazzar colliaziuns da tren cun bus pervia da la mancanza da persunal. Cunzunt deputadas e deputads da la regiun Tavau e Filisur èn sa defendids, perquai ch'ils midaments da tren sin bus muntan pli lung temp da viadi per pendularias e pendularis. L'entira discussiun davart ils plans da la Retica vegn anc ad esser tema la mesemna en il Cussegl grond en il rom da l'ura da dumondas.

Las 11 finamiras da la regenza

Avrir la box Serrar la box
  1. digitalisaziun da l'administraziun chantunala
  2. far pli attractiv il Grischun sco lieu da lavurar e viver
  3. dar bunas circumstanzas per il svilup dal territori
  4. garantir la segirezza publica
  5. promover la coesiun sociala
  6. segirar il provediment d'energia e promover energias regenerablas
  7. strategia da clima cun il Green Deal
  8. promover il sistem da mobilitad
  9. metter a disposiziun ina purschida da furmaziun e perscrutaziun multifara che correspunda als basegns
  10. garantir in provediment da sanadad en l'entir chantun
  11. promover la plurilinguilitad e la diversitad culturala

RTR novitads 18:00

Artitgels legids il pli savens