Orticultura Rodigari a Domat - Adia sontgs da glatsch, hallo stagiun d'iert!
Ils numalizis dals sontgs da glatsch termineschan ils 15 da matg cun il di da la Sofia fraida, pia nairas uras da plantar la rauba en l'iert. Per l'orticultura Rodigari vala il matg sco mais il pli impurtant da l'entir onn, uschia han els actualmain tut ils mauns plain da far.
Legenda:
Tar questa offerta vasta n'è la schelta per la clientella betg adina uschè simpla.
RTR
Da spetgar ils sontgs da glatsch è tenor il manader da l'orticultura a Domat Jürg Rodigari ina buna idea. Fin là saja impurtant da far la segira, che las plantas en l'iert possian en il cas da schelira anc vegnir scuvridas cun in vlies u ch'ins po anc purtar ellas en chasa.
Sontgs da glatsch
Avrir la boxSerrar la box
Entamez il mais matg, pli exact dals 11 fin ils 15 da matg, è il temp dals sontgs da glatsch. Durant ils 5 numalizis dals sontgs catolics pudess tenor differentas reglas da purs turnar la fradaglia.
Perquai saja cussegliabel da spetgar cun plantar en l'iert fin suenter ils 15 da matg, per che las plantas na vegnian betg donnegiadas tras ina sfradentada andetga.
Tgi eran ils Sontgs da glatsch?
11-05: Mamertus (archuvestg da Vienna)
12-05: Pancratius (martir)
13-05: Servatius (uvestg da Tongeren)
14-05: Bonifatius (martir)
15-05: La «fraida» Sophie (martira)
Sur tschientaners hai adina puspè dà fradaglias durant la primavaira en l'Europa Centrala. Uschia è naschida – probabel gia durant il temp medieval – la regla da purs ch'ils Sontgs da glatsch possian anc purtar mez matg ina giada la fradaglia.
Quels Sontgs da glatsch duevan pia gidar ils purs tar lur dilemma da chattar il bun mument per semnar l'iert – betg memia baud e betg memia tard.
Funtauna: Meteoschweiz, SRF
Primavaira procura per la stagiun auta en l'orticultura
Legenda:
Chamina durant la stagiun auta tar la lavur enfin 8 kilometers per di: Jürg Rodigari che maina dapi 28 onns l'orticultura Rodigari a Domat.
RTR
Enturn 70% da la svieuta annuala generescha l'orticultura Rodigari a Domat en il temp tranter mars e zercladur. Tenor il manader da l'orticultura saja durant quest temp da porscher ina gronda schelta da fluras, plantinas, verdura e vaschs a la clientella. El ed ils 14 lavurers hajan ussa pia tut ils mauns plain da far cun tgirar las plantinas al lieu e cussegliar las visitadras ed ils visitaders.
Las plantinas na tiran els betg si en l'orticultura, ma empostan ellas tar partenaris spezialisads. Quai vegn cunzunt fatg durant l'enviern, per ch'els hajan lura la primavaira tut ils regals plain cun fluras e plantas da tuttas sorts.
I va per colliar il client e la planta. Nus stuain damai sentir tge ch'il client è per in tip e tge basegns e giavischs che la planta ha.
Tenor Jürg Rodigari hajan els ils ultims onns strusch gì da bittar davent plantinas che na sajan betg vegnidas cumpradas. Uschia sa svidian ils regals fin la stad adina dapli, ma era suenter la stagiun auta na restian ils regals dentant betg simplamain vids, els vegnian tut tenor stagiun emplenids cun fluras da stad u decoraziun d'atun u Nadal. Durant quests temps pli ruassaivels possian il manader Jürg Rodigari e las collavuraturas ed ils collavuraturs lura era sa recrear da la stagiun auta cun la mantunada da la lavur che quella porta mintgamai.
