Per la penultima giada quest onn èn Svizras e Svizzers clamads a l'urna. Entant ch'il Grischun n'ha nagina votaziun chantunala vegn decis sin livel naziunal gist davart quatter fatschentas. Las vischnancas grischunas elegian e voteschan a chaschun da divers projects.
RTR tegna sin il current davart las decisiuns communalas e federalas:
- Sin rtr.ch chattais tut ils resultats, graficas ed analisas
- Adina puspè sin facebook, twitter ed instagram
- Las novitads al radio rapportan mintg'ura dal pli actual
- Reacziuns ed analisas pudais tadlar al radio a partir da las 12:00 ed a partir da las 16:00
- Il Telesguard resumescha las decisiuns a las 17:40 sin SRF1
Elecziuns e votaziuns communalas
Pliras vischnancas tschertgan in nov president u ina nova presidenta, uschia er Ilanz/Glion e Scuol. Autras vischnancas èn a la tschertga da novs suprastants u suprastantas. E lura datti era pliras votaziuns communalas – sco per exempel davart ina nova staziun da tren, davart credits supplementars u era sch'ins duai scumandar fieus artifizials.
Quatter decisiuns sin livel federal
Per l'ina decidan Svizras e Svizzers davart la refurma da l'AVS 21. Quai en duas fatschentas:
- auzar la vegliadetgna da pensiun da las dunnas sin 65 onns
- auzar la taglia sin la plivalur per gidar da stabilisar las finanzas da l'AVS.
- Sco terz vai per abolir parzialmain la taglia anticipada. Cun questa vul il Cussegl federal abolir la taglia sin tschains ord obligaziuns en Svizra.
- La quarta votaziun pertutga l'iniziativa cunter l’allevament intensiv che vul fixar la dignitad dals animals da niz en la Constituziun federala.
