Da l'october fin il schaner saja l'enviern stà sitg cun mancanza da plievgia e naiv en l'entir chantun, di Yves Quirin da l'Uffizi per la natira e il ambient dal Grischun. Dentant saja l'atun passà stà relativamain bletsch ed il favrer da quest onn cun blera plievgia u naiv haja cumpensà relativamain bain la mancanza. Uschia ch'i na saja insumma betg dramatic.
Guardà sur l'entir onn è la quantitad da plievgia e naiv en l'entir chantun en il rom usità.
Il mars da quest'onn saja stà plitost sitg. Per l’agricultura saja segir impurtant ch'igl dettia durant l'avrigl e matg avunda plievgia ch’ins na vegnia betg en ina fasa da setgira, di Yves Quirin. Er per las funtaunas ed il livel d'aua sutterana na saja betg da far quitads. L'aua sutterana reageschia fitg plaun sin ina mancanza da plievgia u naiv. Uschè ditg sco la precipitaziuns sur l'entir onn na sa midian betg en moda e maniera negativa ed i na saja betg pli e pli regularmain sitg, n'hajan ins nagin problem cun l'aua sutterrana.
Prognosas per las proximas emnas
La Confederaziun fa mintgamai prognosas per l'entira Svizra co che la situaziun da sitgira pudess sa midar il proxim temp. La suondanta carta mussa las prognosas per l'emna actuala. Quella mussa ch'igl è en tschertas regiuns per part in zic sitg.
Per las proximas quatter emnas prognostitgescha la plattafurma naziunala da setgira dentant uschè blera plievgia sco normalmain da quel temp da l'onn, uschia che tut para dad esser en il rom usità.