Spezialmain bleras firmas cun auts quints d'energia vegnan sustegnidas da l'interpresa cun sedia a Turitg. Sco il COO Rochus Burtscher declera, sajan quai firmas or da tuttas branschas. Or da la hotellaria, or da la branscha da chemia cun firmas sco la Ems-Chemie u er interpresas da producziun.
Fitg bleras firmas hajan gia fatg fitg bler pertutgant il spargnar energia, di Rochus Burtscher. Spezialmain firmas grondas hajan investì bler ils ultims onns. Basegn da prender suenter vesa el spezialmain tar interpresas pitschnas e mesaunas. Saja quai tar il mazler, tar il scrinari u tar l'impressari che na sajan savens betg s'occupads propi ferm cun spargnar energia. Simplamain perquai ch'i n'hajan betg stuì, declera l'expert d'energia. Ils custs d'energia na faschevian betg mal.
KMU dumondan pli e pli savens per cussegl
Er firmas pitschnas e mesaunas dumondan pli e pli savens per cussegl ed agid. Rochus Burtscher raquinta ch'el saja savens sin telefon cun mainafaschentas che dumondan suenter tips e suenter sustegn. Ed oravant tut las firmas che n'hajan betg fatg bler quittads pertutgant il quint d'energia, hajan uss bler potenzial. Quai cun mesiras che custan pauc ni nagut sco tschentar giu il computer la saira u midar sin lampas da LED.
Ins chatta adina insatge da spargnar.
Sco expert tar l'ENAW ha el sentì las ultimas emnas la tema existenziala tar interpresas. El n'haja anc mai gì ina situaziun cun uschè bleras dumondas sco actualmain.
Las mesiras per spargnar energia, las pli frequentas en il Grischun:
- mesiras en il sectur da sfradentar
- isolaziun, mirs e fatschada d'edifizis
- apparats d'informatica ed ulteriurs apparats electrics
- stgaudament
- illuminaziun
Las pli effectivas mesiras da spargn en il Grischun:
- illuminaziun
- producir electricitad
- apparats electronics e d'informatica
- mesiras en il sectur da chalira tar process da producziun
- optimaziuns vi da products e process da producziun
