La consultaziun pertutgant il plan directiv d'energia grischun è vegnida nizzegiada bravamain. Tranter auter chantuns vischins, vischnancas, organisaziuns e regiuns han prendì posiziun. Che l'interess saja stà uschè grond na fa betg surstar il cusseglier guvernativ, Marcus Caduff. I saja in segn ch'il tema muventia la glieud.
Il plan directiv cuntegn 21 projects d'energia idraulica, per exempel l’engrondida dal mir da fermada dal Zervreila. Ed el prevesa er 25 zonas per energia da vent. En il plan adattescha il chantun la planisaziun dal territori a la lescha d'energia ed il Green Deal per promover energias regenerablas.
Cunzunt las ovras idraulicas ed ils implants d'energia da vent (implants eroelectrics) han sveglià reacziuns en la consultaziun. Tar las ovras idraulicas pretendian omaduas varts, las organisaziuns da l'ambient, ed ils gestiunaris, che lur interess vegnia resguardà memia pauc, uschia scriva il chantun. Tenor il cusseglier guvernativ, Marcus Caduff, na saja quai dentant gnanc in schlet segn. Sche tuts sajan tuttina malcuntents, hajan els chattar la via amez.
Sche tuts èn tuttina malcuntents, esi grategia a nus da chattar la via amez.
Tar ils implants d'energia da vent e las surfatschas adattadas per quels dettia pli bleras vuschs encunter. Intginas vischnancas e regiuns vesian ils implants dentant sco schanzas, ed i dat er propostas per ulteriuras surfatschas per parcs d'energia da vent. –
Uss suonda l'analisa detagliada
En tut han prendì posiziun 41 vischnancas, 8 regiuns, 9 chantuns vischins, 9 partidas politicas, 165 persunas privatas, 53 da federaziuns ed organisaziuns sco er 16 ulteriuras varts. I dat 3'200 singulas propostas en chaussa. Enfin l'emprima mesadad dal 2024 analisescha il chantun quellas.
I dependia dentant er da la politica naziunala, scriva il chantun. Per l'ina rimna in comité suttascripziuns per in referendum cunter il decret general dal parlament federal davart l'energia. Il referendum pertutgass la lescha federala subordinada.
Per l'autra pudess er il plan dal Cussegl federal d’accelerar las proceduras da lubientscha per energias regenerablas influenzar il sboz per il plan directiv chantunal. Cunzunt pudess quel influenzar il «dretg da cundecisiun, cuntrari a quai ch'era definì avant l'elavuraziun dal sboz dal plan directiv», scriva il chantun. Il parlament a Berna vegn anc a debattar davart ils plans.
La consultaziun per il plan directiv d'energia ha durà dals 12 d'avrigl enfin ils 30 da zercladur.
