Uniuns da sport per giuvenils duain en futur survegnir pli paucs raps. La Confederaziun scursanescha las subvenziuns per Giuventetgna+Sport (G+S) per 20%. Quai vala a partir dal 2026. Tenor il Cussegl federal crescha la dumonda suenter ils curs da G+S. Il medem mument stoppia la regenza dentant spargnar.
Var 680'000 uffants e giuvenils fan mintg'onn part a curs e champs da Giuventetgna+Sport en tut la Svizra. Sco che l'agentura da novitads Keystone-SDA rapporta, vegnan tut las uniuns, organisaziuns ed associaziuns ad esser pertutgadas medemamain.
500'000 francs pli pauc per il Grischun
«Displaschaivel» numna Thierry Jeanneret la decisiun dal Cussegl federal. El è manader da la partiziun sport da l'Uffizi chantunal per scola populara e sport. Ins haja s'engaschà per dapli uffants e giuvenils en il sport – cun success. Ins haja nudà dapli persunas, sco er dapli sorts da sport. Ma gist quel augment procura ch'ils meds stoppian vegnir scursanids.
Nus essan la victima da l'agen success.
Per il chantun Grischun muntass ina reducziun da 20% var 500'000 francs pli pauc – da 2,7 milliuns sin 2,2 milliuns francs. Pertutgadas fissan tut las uniuns da sport medemamain. En Grischun survegn il sport d'enviern la pli gronda cumpart. Las uniuns da sport vegnan definitivamain a badar quellas scursanidas, di Jeanneret fitg precaut.
Speranza tar Grischun Sport
Thierry Jeanneret spera uss ch'il parlament federal augmenta il budget per Giuventetgna+ Sport. Durant la sessiun da december hajan Cussegl naziunal e Cussegl dals chantuns numnadamain la schanza da definir dapli che 115 milliuns francs. Lura na stuess il Cussegl federal er betg scursanir las subvenziuns per G+S.
Teoreticamain fissi er pussibel ch’il chantun Grischun cumpensescha quai che la Confederaziun scursanescha. Quai fiss dentant ina decisiun che la politica chantunala avess da trair, suenter ch’il parlament federal ha decidì davart il budget.
Adattà al tema