Concerts, duels da pingpong, fieras e sairas da comedy - tut quai spetg'ins tar il «Polenta7000» a l'ur da Cuira. Per la sisavla giada ha l'uniun Polenta7000 transfurmà il prà davant l'uschenumnà «bot da polenta» en in lieu da scuntrada cun bancs, ina tribuna, blers plimatschs e maisas coluradas.
-
Bild 1 von 2. In dils motos dal «Polenta7000». Bildquelle: RTR.
-
Bild 2 von 2. Bildquelle: RTR.
Jen Ries da la suprastanza ha vis davent da l'entschatta il svilup da quest festival. «Nus avain guardà gist avant in pèr dis fotografias veglias dal Polenta7000, e quai è propi ina gronda differenza. A l'entschatta avevan nus mo in pèr aissas e sutgas.»
Il Polenta7000 ha dastgà crescher mintg'onn organicamain e bel, cun dapli amur per l'areal e dapli commembers e commembras.
Il mument ha l'uniun bunamain 200 commembras e commembers, l'onn passà eran quai anc var 150. Mintgina e mintgin che ha gust e temp po sa participar a quest project - tge ch'è er stà il motiv, daco che blers èn vegnids tiers.
«Igl è uschè avert, ins po simplamain vegnir e far», di in commember. «Jau sun passà ina giada ina stad ed hai vis quant fortunà che tuts vesevan or – qua hai jau pensà, poss jau bain era contribuir insatge?», di ina autra commembra.
Jau ditg adina: igl è sco ina plazza da giugar per creschids.
Durant emnas han els preparà il Polenta7000, era cun bleras novas chaussas: in automat da fotografar, ina gronda paraid da placats e schizunt sezs vegls da la Viafier retica. Tge ch'ins percorscha svelt, mintgin po far quai ch'el vul, po purtar sias atgnas ideas ed esser creativ.
Il motiv principal per il success, manegia Jen Ries da la suprastanza: «Per nus èsi fitg impurtant che tuts possian sa participar.»
-
Bild 1 von 3. Bildquelle: RTR.
-
Bild 2 von 3. Bildquelle: RTR.
-
Bild 3 von 3. Bildquelle: RTR.
Da l'entschatta matg fin l'entschatta avust èn avertas las portas dal Polenta7000 – ina oasa tranter la citad da Cuira e l'autostrada.