Avant prest in onn è Fadri Cadonau vegnì onurà cun il premi d’art 2025 da l’Uniun grischuna d’art. Tranter 50 auter artists ed artistas grischunas ha el lura pudì persvader la giuria. Part dal premi è era ina atgna exposiziun en il Museum d'art grischun. E quella datti ussa en il rom da l'exposiziun annuala da l'Uniun grischuna d'art da contemplar.
Cun sia installaziun actuala cun il num «Commons of Tragedy», envida Fadri Cadonau ses public en in mund istoric che tutga la sfidas d'in mund modern. Entamez la stanza stat ina gronda installaziun da laina ed ina bognera d’atschal: Ils quatter chanals, nua che l'aua cula, vegnian purtads da chommas da laina. E quai na saja betg x ina laina, mabain laina dad ischis da Breil. Natiralmain tut elavurà sez da l'artist da 29 onns, Fadri Cadonau.
Quella installaziun è inspirada dals chanals dal Vallais. Nua che la glieud ha stuì rimnar l’aua dals culms perquai ch'igl è stà memia sitg en las vals.
E quels chanals dad aua na tutgavan betg ad ina instituziun mabain a tuts. Lavur cumina. Far insatge dal bun per la communitad. Insatge che giaja adina pli e pli a perder en nossa societad moderna, nua che l'individi stettia en il center, uschia Fadri Cadonau.
L’idea per quella tematica saja gia daditg en ses chau. La moda maniera sco inscenar quella tematica – quella saja lura pir sa sviluppada en il decurs dal temp, influenzada da plirs facturs.
Ina gronda influenza ha il lieu nua che jau abitesch gist. Ussa sun jau datiers da l’alp. E perquai è quai mia inspiraziun.
Preparaziun intensiva
La preparaziun sin quella exposiziun saja stada fitg intensiva, cunzunt corporalmain, uschia il giuven artist da Glion. Pinar plantas e lavurar cun laina vul sia forza, vi da la quala che Fadri Cadonau haja l'entschatta stuì s'endisar. Uss, bunamain in onn pli tard, stat el davant sia installaziun da laina cun il num «Commons of Tragedy» ed è losch.
Jau sun losch che jau sun vegnì da far quai en quella grondezza e lura tut a maun.
Losch saja el natiralmain era d'astgar purtar il titel sco victur dal premi d'art 2025 da l'Uniun grischuna d'art. Propi crair, na possia el anc adina betg quai, uschia l’artist sursilvan.