La SRG Svizra Rumantscha SRG.R undrescha Norbert Cavegn da Vella cun il Premi SRG.R 2026. La suprastanza vul uschia onurar ses engaschi da blers onns sco president dal comité d’organisaziun da l’Openair Lumnezia.
Dapi passa 32 onns fa Norbert Cavegn part dal comité d'organisaziun da l'Open Air Lumnezia, e dapi 26 onns presidiescha el quel. Sut sia direcziun è l’Openair Lumnezia sa sviluppà ad in dals festivals da musica ils pli impurtants da la Svizra.
Oz è l’occurrenza betg mo part fixa en la scena culturala dal Grischun, mabain er renconuschida sin plaun naziunal, cun ina gronda relevanza culturala, linguistica e sociala. L’Openair Lumnezia promova la musica svizra, spezialmain artistas ed artists rumantschs e da la regiun, e serva a medem temp sco tribuna per acts naziunals ed internaziunals.
Questa colliaziun tranter identitad culturala, avertadad e professiunalitad renda il festival unic en la cuntrada svizra da festivals, argumentescha la SRG.R sia decisiun.
Surdà vegn il premi, ch'è dotà cun 8'000 francs a chaschun da la radunanza generala da la SRG.R ils 30 da matg a Glion.