Ils temas, las finamiras e la tenuta èn medem tar la partida naziunala e la partida chantunala da la Verda. Tuttas duas mettan las prioritads tar il clima. Ad occasiun da la radunanza da delegads e delegadas ha Lisa Mazzone, la presidenta da la Verda svizra declerà ch’i dettia naginas differenzas essenzialas tranter las partidas. La presidenta da la partida chantunala Grischuna, Anita Mazzetta manegia ch’els dal Grischun han plitost la vista da regiuns muntagnardas e quest aspect dattan els alura vinavant a la partida naziunala.
Differenzas tar la grondezza
Tar las elecziuns l’onn 2019 ha la Verda gudagnà sez en il parlament naziunal – dal 2023 alura puspè pers intgins da quests. La partida naziunala Verda è actualmain represchentada cun 27 persunas en il parlament a Berna. Uschia furma ella in’atgna fracziun ed è preschenta en il Cussegl naziunal ed era en il Cussegl dals chantuns.
Auter guardi actualmain ora en il Grischun, là è la Verda betg in’atgna forza. Per exempel en il parlament da la citad da Cuira lavura ella ensemen cun la glista libra. En il Cussegl grond lavura la Verda ensemen cun la partida socialdemocratica. Cun dus sez na cuntanschan Anita Mazzetta e Simon Gredig betg la fermezza da fracziun. Durant la radunanza han els sez ditg che la Verda na saja anc betg propi ina veritabla partida chantunala. Per midar quai han els dentant ambiziuns.
Nus essan anc en ina fasa da bajegiar si. Quai è l’emprima giada che nus main sulets en questas elecziuns da proporz dal Cussegl grond sco partida Verda. Quai dovra temp, dentant faschain nus uss l'emprim pass e guardain nua che nus tschentain.
La finamira è da cuntanscher la fermezza da fracziun cun tschintg sez – tantas persunas dovri per ch’ina partida po sez esser ina fracziun. U per dir en ils pleds da Simon Gredig, da daventar ina «veritabla» partida.
Enfin uss han Anita Mazzetta e Simon Gredig da la Verda Grischun lavurà ensemen cun la partida socialdemocratica en il Cussegl grond. Anita Mazzetta di che questa collavuraziun funcziuna bain. Ils temas da la Verda sa differenzieschan dentant da la PS. Las opiniuns e temas na sajan betg il cuntrari, dentant in'autra prioritad. Tar la Verda è la prioritad claramain tar il clima ed il ambient. Il giavisch da libertad cun in’atgna fracziun fiss grond.
Il clima in tema da l'ur
Clima ed ambient sajan ord optica da la societad actualmain plitost temas da l'ur – quai è era vegnì discutà a la radunanza da delegads e delegadas. La situaziun mundiala maina tar autras discussiuns tar auters temas. Ed era sch’il clima resta tar la Verda il tema da prioritad s’engascha ella era per auters temas. La partida chantunala s’engascha tenor Anita Mazzetta era per il provediment da sanadad en regiuns, per il traffic public ed il svilup d’indriz solars. Quant sustegn che la Verda Grischuna survegn cun ses temas, quai sa mussa sco proxim il zercladur tar las elecziuns dal Cussegl grond.