En il laboratori en la Scola auta spezialisada dal Grischun (FHGR) a Cuira stat in model nunusità. Ina laterna da via cun camera e sensurs, sutvart in pitschen automobil teleguidà. Quai che para a prima vista sco in termagl è part d'in project da perscrutaziun serius. La finamira è da render pli intelligent l'illuminaziun da las vias tradiziunala e da spargnar energia.
L'idea
Laternas sin via na duain en il futur betg mo glischar, mabain era percorscher tge che sa mova. Cun agid da sensorica simpla pon ins classifitgar e dumbrar vehichels – per exempel quants camiuns u autos da persunas che passan.
-
Bild 1 von 7. Il prototip installà. Bildquelle: RTR.
-
Bild 2 von 7. Bildquelle: RTR.
-
Bild 3 von 7. Bildquelle: RTR.
-
Bild 4 von 7. Bildquelle: RTR.
-
Bild 5 von 7. Il prototip, camera e sensurs. Bildquelle: RTR.
-
Bild 6 von 7. Tobias Leutenegger, il mainaproject a la FHGR. Bildquelle: RTR.
-
Bild 7 von 7. Bildquelle: RTR.
Nagin privel da protecziun da datas
Ina finamira centrala dal project è la protecziun da datas. Ils sensurs na transmettan nagins maletgs, mabain mo datas da dumbraziuns.
Ils maletgs na vegnan betg arcunads. La camera ha er ina resoluziun uschè mala ch'ins na po betg vesair fatschas u numers. Transmess vegn mo in quintader cun ina categoria d'objects correspundenta.
Tecnicamain metta il project sin interfatschas da standard existentas ch'èn gia construidas en bleras laternas. Uschia sa lascha il nov sensor simplamain modernisar – in avantatg per citads e vischnancas che na vulan betg renovar cumplettamain lur infrastructura.
Visiun futuristica per ina «Smart-City»
La tecnologia pudess er vegnir duvrada en l'avegnir per identifitgar parcadis libers u per diriger signals da traffic. Anc è il sistem in prototip – ma ils tests mussan ch'ins po gudagnar datas da traffic preziusas cun duvrar pauc energia.