Mussavias preparads per la communicaziun da crisa en tut las trais linguas chantunalas. Quai è be in da passa 50 cussegls co meglierar il management da crisa ch'experts da l'ETH da Turitg preschentan en in rapport. In auter cussegl è da sparter las lavurs operativas e las lavurs strategicas en il stab directiv. Plinavant stoppia il chantun definir pli cler, tge ch’il stab directiv dastga insumma decider en l’administraziun chantunala.
Definir tgi che lavura cun tgi
Cussegls dattan ils experts er en chaussa organisaziun e process da lavur. Tenor els fissi bun da definir oravant, tge posts da l’administraziun chantunala che lavuran ensemen e co ch’els duain far quai. Il medem vala per la collavuraziun cun las vischnancas e la Confederaziun. Quai gidass d’evitar malsegirtads e da pudair reagir pli svelt ed effectiv, hai num en il rapport.
Regenza vul realisar ils cussegls
Il rapport ha il center da cumpetenza da l’ETH Turitg elavurà sin incumbensa dal chantun. Uss ha la Regenza era gia incumbensà ils uffizis chantunals d’elavurar in plan, co il chantun po realisar ils cussegls.
