Ils effects dals conflicts globals sajan tenor Christian Dussey, il schef dal servetsch d'infurmaziun da la Confederaziun NDB, era da sentir en Svizra. Cunzunt la rivalitad tranter ils Stadis Unids e la China vegnia er ad avair in effect sin la Svizra. Ma era la collavuraziun da la China cun la Russia, cun la Corea dal Nord sco era cun l'Iran gioghia ina rolla.
La Svizra saja en quest connex cunzunt pertutgada da spiunascha tras la Russia e la China. Uschia emprovian quests pajais d'obtegnair infurmaziuns davart tecnologias per programs d'armament e programs nuclears. Ma era cun cyberattatgas sin infrastructura impurtanta stoppian ins quintar, ha ditg Christian Dussey.
Situaziun da segirezza vegn adina mendra
Tenor il nov rapport dal servetsch d'infurmaziun «Segirezza 25» è dapi l'onn passà il dumber dals privels sa midà. «Ils conflicts globals pertutgan nus directamain. Noss radar mussa 15 differents focus il medem mument», ha communitgà Christian Dussey.
Uschia ina spessezza da privels il medem mument n'avain nus anc mai vis.
La situaziun da segirezza daventia onn per onn mendra. Betg mo la guerra tranter la Russia e l'Ucraina cuntinueschia, mabain era l'Israel haja directamain attatgà l'Iran quest zercladur. Quests conflicts ch'han tuts lieu il medem mument auzian la malsegirezza sin l'entir mund.
Radicalisaziun dals giuvenils fa quitads
Cun l'attatga da l'Israel sin l'Iran quest zercladur saja era il privel da terror creschì. Questa attatga saja numnadamain tenor il servetsch d'infurmaziun da la Confederaziun stada in'umiliaziun per l'Iran – e quella metta la regenza iranaisa sut squitsch. I saja era pussibel che l'Iran fetschia vendetga ordaifer la regiun dal Proxim Orient, per exempel cun acts terroristics en l'Europa.
Il privel d'acts terroristics en l'Europa è augmentà.
Sco in auter exempel numna il NDB la radicalisaziun online da giuvenils e giuvenilas. Ma era la situaziun instabila en la Siria suenter la cupitgada dal regent Baschar Al-Assad fetschia quità. Anc adina sa chattian en la Siria praschuniers dschihadistics ch'èn vegnids da la Svizra. Sch'il Stadi Islamic damognia da liberar quels, fissan els in privel per la Svirza. «En cas ch'il return na vegn betg controllà avunda, han questas persunas il profil e l'experientscha da radicalisar il conturn.»