La regenza duai tractar il project Porta Alpina cun la pli gronda prioritad. Quai cura ch’i va per inoltrar il concept chantunal da traffic per il proxim pass dal program da svilup strategic da l’infrastructura da viafier. Quai pretenda in’incumbensa dal deputà en il Cussegl grond René Epp. En sia ultima tractanda ha il Cussegl grond surdà l'incumbensa a la regenza senza far midadas e betg sco proponì da la regenza.
Il mument n’ha la regenza grischuna betg la pussaivladad da purtar novas propostas per il proxim pass dal program da svilup strategic d’infrastructura da viafier. Perquai n’èsi betg pussaivel da proponer d’integrar il project Porta Alpina en il proxim project chantunal. Quai na saja betg legraivel, uschia il deputà René Epp ch’ha inoltrà l’incumbensa.
Era betg propi cler saja tge ch’il chantun ha fatg dapi che l’emprima incumbensa il 2020 è vegnida inoltrada. Uss vegnia el a concretisar l'october sia cumbensa cun la pretensiun d’integrar las experientschas fatgas cun il manaschi da la NEAT. Il pensum dal chantun saja uss da mussar co in manaschi è tuttina pussaivel e da persvader alura la Viafier Federala ed ils paralmentaris federals, di René Epp. Il project duai vegnir tractà en ina da las proximas planisaziuns, probabel il 2030, scriva era la regenza grischuna.
Viafier Federala ha resalvas
La regenza punctuescha en sia resposta che las Viafiers Federalas na beneventian betg lavurs vi d'ina staziun sutterana durant ch’il manaschi circulescha. Qua valia uss da far quellas examinaziuns davart dal chantun, per alura chattar ina soluziun, di René Epp. Il Cussegl grond e la populaziun veglia la Porta Alpina. Sch’il project vegnia sisum sin la glista dal proxim concept chantunal, alura ha il project bunas schanzas da vegnir tractà en il parlament naziunal, uschia il deputà. Ma impurtant saja uss da sclerir ed elavurar in bun project che chatta maioritads.
L'onn 2006 ha il pievel ditg Gea al credit da 20 milliuns francs per la Porta Alpina. Il project era 2007 vegnì spustà sin il 2012, il medem onn cura ch'el è vegnì sistì. Il 2020 ha la regenza grischuna decis unanimamain da reprender l'incumbensa per tractativas davart la Porta Alpina.
