Suenter ina lunga perioda da cas da dretgira ha il Tribunal federal refusà tutts recurs l’onn passà, ed uschia dà glisch verda per la realisaziun dal resort da vacanzas Viols. La Resalpina GmbH planisescha uss da cumenzar las lavurs la primavaira dal 2026. La lubientscha da construcziun è gia valida e na sto betg vegnir renovada.
Marcel Friberg, manader da Resalpina GmbH, declera: «Nus essan uss en las ultimas fasas da planisaziun detagliada e preparain la submissiun per las lavurs. La lubientscha da construcziun è en vigur, uschia ch’ins po cumenzar suenter l’atun. Las investiziuns èn s’augmentadas pervi dals cas giudizials da 30 a circa 40 milliuns francs.»
Nus essan uss en las ultimas fasas da planisaziun detagliada e preparain la submissiun per las lavurs.
La vischnanca Surses ha deliberà l’avrigl in credit d’investiziun da 948’000 francs per la construcziun da la via d’access privata e da las plazzas da parcar. Ils custs vegnan repartids tranter la vischnanca ed il proprietari dal resort.
Friberg agiunta: «La vischnanca ha approvà la soluziun d’access e nus stuain anc suttascriver ils contracts finals. Per nus è impurtant ch’ils detagls vegnan definids spert per evitar retard en la construcziun.»
Il project duai rinforzar la reputaziun da Savognin sco destinaziun attractiva per vacanzas e turissem.