Suenter che la radunanza communala da Trin aveva votà il mars passà stgars per il project da restructuraziun dal santeri è sa furmà in comité d'iniziativa che vul reponderar – per tudestg «Wiedererwägung».
La stad passada è l'iniziativa cun 239 suttascripziuns vegnida inoltrada, il december ha la radunanza communala votà per ina reponderaziun.
Corpus delicti: in pitschen plaz da sulada
-
Bild 1 von 2. Bildquelle: RTR.
-
Bild 2 von 2. Bildquelle: MAD vischnanca Trin.
Ina part dal prà al nord da la baselgia duai daventar in pitschen plaz cun crappa da sulada ch'ins pudess duvrar sco lieu d'entupada e per occurenzas da la plaiv. Ed exact quella plazzetta da circa 8 meters quadrat è il «corpus delicti» u ina da las raschuns principalas che Trin ha in zic in «hantieri» cun il santeri.
Natiralmain ch'ins s'entaupa magari sin santeri, ma il prà dess restar prà.
I na dovria betg in plaz explizit da s'entupada sin santeri. Sch'i saja necessari possian ins duvrar il prà. En general duai il santeri esser in lieu da ruaus senza disturbis nungiavischads. I na fetschia betg da basegn dad investir daners per in plaz da sulada che fissan investids meglier ad in auter lieu.
Suenter la decisiun stgarsa il mars passà saja surtut glieud pli passada s'accurschida ch'els na sajan betg d'accord cun ils plans da restucturaziun. Suttascrit l'inziativa hajan dentan persunas da tuttas vegliadetgnas, betg mo ils «vegls».
Igl è stà ina surpraisa
L'opposiziun cunter ils plans per il santeri na saja betg stada previsibla, di il president communal da Trin Maurus Caflisch. Ins haja gia onns avant adina puspè discurrì ch'ins veglia restructurar il santeri. Sch'ins avess savì ch'il santeri procura per tantas emoziuns e discussiuns avess la vischnanca infurmà auter gia avant la radunanza communala e forsa era fatg in'occurrenza d'infurmaziun per la populaziun.
Maurus Caflisch ha chapientscha ch'in lieu d'entupada sin il santeri po procurar per emoziuns e discussiuns. Ma ord sia vista haja la baselgia da far cun l'entira vita, dal batten fin la mort. L'entir lieu duai er demussar quai, e betg mo metter paisa sin l'ultima part da la vita.
Co enavant?
Suenter l'inoltraziun da l'iniziativa valaivla il zercladur ha la vischnanca immediatamain sistì tuttas lavurs – maschinas na sajan anc stadas naginas sin il plaz. Il process politic dat avant che la radunanza communala discutescha e votescha uss anc ina giada davart exact il medem project. Maurus Caflisch quinta ch'i vegnia a dar in Na. Munta pia: enavos sin start – nova gruppa da lavur, nova ed autra proposta per la restructuraziun dal santeri a Trin.
Tge di la plaiv?
Proprietari dal funs è la vischnanca da Trin. Sa chapescha che er la plaiv è stada involvada en l'elavuraziun dal project. La plevonessa da Trin Gisella Belleri è nov en uffizi dapì il november passà. Uschia ch'ella na saja betg stada involvada en il project dal santeri.
Jau observesch ch'in lieu da s'entupada para per ils da Trin dad esser ina chaussa dad auta e groppa.
Tenor sia chapientscha saja in lieu da s'entupada dentant insatge tut auter: in lieu nua che glieud possia vegnir ensemen per sa barattar e per exempel forsa er baiver e mangiar insatge tar in aperitiv.
Il plaz che vegnia liber possia en mintga cas er vegnir duvrà. La plevonessa di ch'ella haja chapientscha ch'ins saja da l'avis ch'in santeri saja in lieu da regurdanza nua ch'il dess reger dignitad – ma l'in na sclaudia betg l'auter.
La fin finala sajan er differentas generaziuns che fruntian ina sin l'autra. E quellas hajan in'auter pensar per exempel quai che pertutgia la pietad. Lezza fiss tenor Gisella Belleri en mintga chas dada, er sch'il dess in plaz da s'entupada sin il santeri.