A partir da la mesemna suentermezdi datti plievgia ed il cunfin da naiv sa sbassa vers saira sin 1'000 fin 600 meters. Durant la notg e la gievgia durant il di vegn quai lura adina puspè a naiver. La blera naiv nova duai dar en il Grischun dal Nord, di Jürg Zogg da SRF Meteo. En las regiuns autas dal Scanvetg e dal Partenz datti tranter 30 fin localmain 80 centimeters naiv nova – uschiglio en blers lieus fin a 20 centimeters naiv nova.
Plinavant èsi fin la mesemna saira da quintar cun vent ferm, en la Val dal Rain duai dar suffels ch'èn ferms fin burascus. Sin ils pizs da las muntognas restia fin il venderdi burascus, qua pudessi schizunt dar singuls suffels d'orcan.
Fin che nus survegnin puspè aura sulegliva e amiaivla, dovri anc in zic pazienza.
A partir da la fin d'emna giajan las temperaturas bain in zic ensi. Dentant na saja ils proxims dis betg da quintar che la temperatura arrivia sur 15 grads ora.
Co proteger la pumera durant las notgs da schelira
Cunzunt en la regiun enturn Cuira haja la vegetaziun quest onn entschet da chatschar baud. Las raschuns èn tenor Marco Frey dal Plantahof il favugn ed ils ultims dus mais che sajan stads plitost chauds. Uschia flureschian gia intginas sorts da pairers, da tschareschers e da primblers.
Las plantas han tras las temperaturas che crodan in grond stress.
Sche las temperaturas sa sbassan sut dus grads, pudessi tut tenor spezia da planta dar donns da schelira. Per proteger la pumera en l'agen iert, cusseglia l'expert da pachetar en ella cun in vlies. Quai fetschia da basegn tar las plantas ch'èn gia en flur ni curt avant flurir. Mo er sche la flur è gia passada, saja ina protecziun da basegn; per exempel hajan apricosers durant il punct culminant da la flur ina toleranza da fin a minus 1,5 grads. Suenter la flur, pia durant il stadi da fritgs giuvens, saja la toleranza dentant be pli tar minus 0,5 grads.
Impurtant saja, tut tenor aura, da remover il vlies durant il di. Uschia ch'ils avieuls possian cuntanscher las flurs per fructifitgar ellas. Sch'i na dat nagina plievgia sgolian ils avieuls selvadis uschè spert che la temperatura cuntanschia 4 fin 5 grads, a partir da 10 fin 12 grads sgolian lura er ils avieuls da mel.