Meteorologiacamain ha la primvaira cumenzà l'entschatta mars. L'aura cun temperaturas miaivlas e bler sulegl en Svizra ha laschà emblidar l'enviern e prender ord stgaffa ils t-shirts e las blusas primavaunas. Astronomicamain n'è la primavaira però anc betg arrivada. Ella cumenza cun l'equinotg – cura che la notg è per l'emprima giada uschè lunga sco il di. La data exact da l'entschatta da la primavaira variescha – dependend da la zona da temp – tranter ils 19, ils 20 ed ils 21 da mars.
Ils utschels èn quels che procuran per il sound da primavaira. Ils utschels ch'èn restads en Svizra han gia intensivà lur chant, il sulegl è lur dirigent. Ed er inqual utschè ch'è sgulà per l'enviern en il sid è da return en il Grischun.
Ed apropos chantar. Forsa laventan il sulegl e las temperaturas miaivlas er Voss gust da chantar. I dat in'entira schurma chanzuns da primavaira rumantschas.
Avais savì? I dat uschè bleras chanzuns per il mais primavaun da matg sco per nagin auter mais da l'onn. L'emissiun «Noss chors» ha rimnà inqual ivetta primavauna.
La primavaira n'ha betg be animà inqual cumponist d'experimentar cun tuns e tacts, ella ha era da porscher insatge linguisticamain. Davart midadas da l'aura, il cumenzament da la nova stagiun ed ils sentiments positivs datti er blers proverbis rumantschs.
Sche las sairas èn pli lungas animeschan ellas er d'ir giuado, far sport u da giugar ensemen gieus. Tschertas vischnancas grischunas han schizunt «agens» gieus da primavaira. Tgi enconuscha ils gieus «Trais lain», «La plänca» e «Titsch-tatsch»? Dai in sguard!
Sche quai fa betg gust da primavaira. E per ils stinads tranter Vus che na vulan betg anc beneventar la nova stagiun. En divers territoris da skis dil Grischun èsi anc pussaivel dad ir cun skis, anc in mument. Ma suenter, èsi per franc primavaira, ubain forsa gia stad.
E sco ultim tip anc: In salid da primavaira per rumantsch per tes char, tia chara, per l'onda u il figliol. Quai è pussaivel cun trametter las cartas digitalas da RTR.