Lantschà per propi l’onn electoral ha la cussegliera naziunala socialdemocratica Sandra Locher-Benguerel. Mez schaner ha ella annunzià da betg pli candidar per in’ulteriura legislatura. Cun quai è il cumbat per il tschintgavel sez lantschà. Po la PS salvar quel ni turna il sez enavos tar la Partida populara svizra dal Grischun?
Era tar la Partida liberaldemocratica dal Grischun procura la dumonda tgi che duai ir a Berna per tensiuns entaifer la partida. La culpa è l’anteriur cusseglier guvernativ Christian Rathgeb che ha annunzià in onn avant las elecziuns ch’el veglia candidar sin la glista dal PLD per il Cussegl naziunal. Tenor el per sustegnair la candidatura da la cussegliera naziunala en uffizi Anna Giacometti. Ni forsa plitost per remplazzar ella? Il matg, a chaschun da la radunanza da nominaziun ha la partida lura mussà colur.
Tgi cun tgi? La dumonda davart las colliaziuns da glistas ha era dà da discutar en il Grischun. Auter ch'en plirs chantuns da la Bassa ha la PLD betg tschertgà dad ir ensemen cun la PPS en il cumbat electoral. In bloc burgais unì na datti era questa giada betg. Per la PPS Grischuna ina schanza tralaschada.
2-2-2-1. Quai n’è betg la furmla magica dal Cussegl federal mabain la repartiziun dals sez grischuns en il Parlament federal. Gronda victura dals 22 d’october è la PPS. Ella reconquista suenter quatter onns in segund sez en il Cussegl naziunal. Nov commember da la delegaziun grischuna a Berna è Roman Hug, il president da la PPS Grischuna. Era per el ina surpraisa.
