Suenter l'arrestaziun da quatter mafiosos a Roveredo èn vegnidas prendidas mesiras che duain impedir che mafiosos immigreschan. Uschia pon persunas estras cun permissiun da dimora B declerar sezzas lur chastis precedents e lur proceduras currentas. Ultra da quai èsi obligatoric d'examinar l'extract dal register penal, per ina permissiun da dimora en il Mesauc – al qual appartegna era Roveredo.
Il schurnalist Ciro Formisano è sceptic, sco ch'el di en l'intervista cun Radio e televisiun Svizra taliana, RSI.
RSI: Sco quant effectivas giuditgais Vus questas mesiras?
Ciro Formisano: Questas mesiras èn segir in signal impurtant, era sche jau na crai betg ch'i tanschia. Igl è in emprim pass, dentant betg il fundamental. Igl èn obstachels che la mafia po teoreticamain guntgir simplamain cun collavuraturs senza macla. Tenor mai stuain nus midar in pau las reglas, introducir in sistem per persequitar cleramain ils fluss finanzials ed era da quints, sco il conto da taglia talian, per tschiffar ad uras transacziuns nuntransparentas e per tutgar cun mesiras preventivas – per exempel confiscaziuns – la facultad dals mafiosos.
Or da tge motiv sa decidan commembers da la Camorra da gist ir en Svizra a star en il Grischun?
La mafia agescha oz sco interpresas multinaziunalas. Ella ha lur sedia principala en il territori d'origin e lieus da manaschi sin l'entir mund. Ella tschertga pussaivladads economicas, incumbensas, daners dal stadi, ed ella s'inscuntra cun chanzlias da notars e fiduziaris. Ella ha mess davent las armas da fieu. Ins sto cumparegliar: Per in mazzament ristgan ins in chasti per vita duranta, per in quint sfalsifitgà, cun il qual ins po muventar milliuns euros, sin il pli in pèr mais praschun.
La regenza grischuna considerescha ina rolla activa da differents acturs sco indispensabla en il cumbat cunter la mafia. Tge pensais Vus da quai?
Giovanni Falcone (il famus chatschader da la mafia) ha ditg ch'il cumbat cunter la mafia na dastgia betg vegnir limità sin la lavur da la giustia. I dovra coesiun. Mintgin sto far sia part.
Vus avais ditg che la mafia sa sviluppeschia vinavant, haja diversifitgà sia fatschenta criminala. Cartais Vus ch'igl è pussaivel da chapir pli profundamain questas dinamicas per cumbatter ellas a moda efficazia?
Tschiffar a temp las dinamicas da la mafia è deplorablamain quasi nunpussaivel, surtut perquai che la mafia ha in avantatg, dapli daners, dapli cumpetenzas e dapli resursas. Ella ha en servetsch hackers e persunas dal fatg, ils quals èn per exempel da viadi en il darknet.
Da l'autra vart datti en las procuras publicas talianas anc computers dals onns 1990. Tenor mai ston ins investir en novas persunas dal fatg e pajar quellas commensuradamain per evitar che quellas lavurian per la mafia. Mo uschia pudain nus forsa cumenzar a chapir las structuras pli novas da lur economia.
Fatg il discurs ha Grigioni Sera / RSI
As participai a la discussiun:
Or da l'archiv: