L'exposiziun ha cumenzà il zercladur 2022. L'uniun «Schichtwechsel - La Surselva» ha vulì mussar la gronda ritgezza da crappa en la Surselva. Per attrair l'attenziun dal public ha l'uniun era organisà differentas occurrenzas, guidas tematicas e preschentaziuns da teater - per part en collavuraziun cun il museum regiunal da Glion.
La fin dall'exposiziun
Uss, suenter bunamain quatter onns, è l'exposiziun a la fin. L'uniun d'organisaziun sco era la vischnanca tiran ina bilantscha positiva.
L'exposiziun ha purtà lavur a differentas interpresas da la regiun, ella ha purtà osps e fatg reclama per nus.
Ma tge capita uss cun la crappa, suenter l'exposiziun? Actualmain vegn quella allontanada cun maschinas e camiuns. Ma betg tut ils craps ston bandunar Glion. 13 dad els èn vegnì tschernì per bajegiar ina fontauna sin il plaz nov da la staziun che vegn mumentan construì. Ina cumissiun ha elegì la crappa sco simbol per las 13 fracziuns da la vischnanca da Glion. Quels craps duain furmà il funs per ina radiella – nua che l’aua duai siglir ord differentas glondas or dal palantschieu.
Intgins craps èn era gia vegnì duvrads per bauns novs sin la plazza da la posta amez la citad.
La fin da l'exposiziun da crappa
-
Bild 1 von 5. Davos Rino Caduff, il president da l'uniun «Schichtwechsel», èn lavurants vidlonder da transportar davent in dals craps. Bildquelle: RTR.
-
Bild 2 von 5. Marcus Beer, president da la vischnanca da Glion, sper in dals craps da l'exposiziun che steva avant la chasa communala a Glion. Bildquelle: RTR.
-
Bild 3 von 5. In crap da l'exposiziun sa chattava a la staziun da Glion. Bildquelle: FMR.
-
Bild 4 von 5. Il plaz avant la baselgia catolica a Glion è uss puspè vits. Bildquelle: RTR.
-
Bild 5 von 5. Lavurers removan la crappa da l'exposiziun or da la citad. Bildquelle: RTR.
E tut la crappa che na vegn betg duvrada per bajegiar insatge nov a Glion, quella vegn transportada anavos a Rueun – sin il plaz nua ch'ella è vegnì elavurada e preparada per l'exposiziun. Quels objects d'art san alura vegnì cumprads da persunas interessadas.
L'uniun «Schichtwechsel – La Surselva» sto anc mirar, coi va vinavant cun lur uniun suenter la fin da l'exposiziun. Ma il resun da la populaziun saja la finala stà – malgrà ch'i haja era adina puspè dà critica – per la gronda part bun.
Nus sentin che biars auters èn era trists e sa dumandan daco ch'ils craps ston davent. Ma jau stoss dir: Quell'exposiziun ha gì in entschatta ed uss ha ella ina fin.
E la fin da l'exposiziun da crappa sursilvana, lezza ha lieu cun in act final la sonda, ils 18 d'october a las 16:00, en la claustra da Glion.