Suenter la dumengia da gronda tensiun sesan ils deputads e las deputadas puspè ils proxims trais dis en il Cussegl grond e debatteschan divers temas.
In quint annual cun in deficit
Il Cussegl grond ha da sa fatschentar cun il quint annual da l'onn 2025. Quel è quest onn auter ch'usitadamain ils ultims onns. Adina puspè èsi vegnì budgetà il passà in deficit, ma la fin finala è adina sa resultà in gudogn. Quest onn serra il quint annual però propi cun in deficit. In dals motivs principals è ina contribuziun en la finanziaziun speziala per la protecziun dal clima e l'innovaziun. Era las investiziuns èn creschidas.
Elecziun nov presidi da regenza
Suenter las elecziuns è avant las elecziuns: il Cussegl grond ha durant la sessiun da zercladur d'eleger in nov u ina nova presidenta da la regenza ed in vice-presidi per il 2027. Quest onn presidiescha Martin Bühler la regenza e Carmelia Maissen è vice-presidenta.
Gulivaziun da finanzas
La gulivaziun da finanzas datti dapi il 2016 èn Grischun. Ed enfin uss tira il parlament in facit positiv. En questa sessiun dain vegnir adattadas intginas chaussas. Per exempel duess en futur era quintar l'autezza sur mar da la vischnanca sco factur da calculaziun. Cunter quest punct pudessi dar critica da deputads e deputadas da las valladas dal sid che giaschan bass. Ed era las vischnancas che pajan bler, talas en Engiadin’Ota u er Ferrera pudessan anc avair ina u l’autra dumonda u remartga en questa discussiun.
Bleras dumondas ed incumbensas
Plinavant han deputadas e deputads da sa fatschentar cun in scumond da telefonins en scola, cun forza idraulica e davart il luf-tscherver. Tar la forza idraulica datti duas incumbensas, ina pretenda dal chantun in rapport intermediar da la strategia ch'i dat dapi il 2022. La segunda pretenda mesiras per che las ovras pon vegnir schlargiadas pli spert.
Tar ils lufs-tscherver vai per ils dus ch'èn vegnids sajettads per sbagl l'atun 2024. La Confederaziun ha lubì al chantun Grischun da remplazzar quests cun dus auters. Pervia da duas incumbensas or dal Cussegl grond è questa planisaziun sistida, co vinavant saja ina da las respostas che la regenza dat en questa sessiun.