Sin la Svizra spetga danovamain ina unda da chalira, en il sid ha ella gia cumenzà la dumengia passada. A partir da mardi suonda lura er il nord ed il vest da la Svizra cun temperaturas da fin 35 grads. La Confederaziun ha perquai dà ora in avertiment da chalira sin stgalim 3 – quai fin almain l'auter gliendisdi. Ed er en il Grischun stopp’ins quintar cun dis da chalira, sco Jürg Zogg dad SRF Meteo ha ditg envers RTR.
En la regiun da Cuira datti ils proxims dis 30 fin a 33 grads. Anc pli chaud vegni cunzunt en il Mesauc cun 35 u 36 grads.
En bleras parts dal Grischun èsi gia pli ditg sitg. Il glindesdi ha il chantun Grischun perquai extendì il scumond da fieu absolut. Da nov vala quel era per il Mesauc ed il Puschlav. En il nord dal Grischun e parts dal Grischun central vala quel gia dapi passa in’emna.
Quest scumond da fieu absolut vegn probabel er anc a restar in temp, perquai che grondas pluvidas n’èn actualmain betg en vista. Tenor Jürg Zogg poi a partir dal venderdi dar in u l'auter urizi, cunzunt en il sid dal chantun, la fin d'emna forsa era en autras parts dal Grischun, dentant be fitg local.
Per terminar la sitgira dovri plirs dis plievgia intensiva.
Uschè chaud sco l’ultima unda da chalira na daventia dentant betg, sco Jürg Zogg ha ditg. Uschia ch’ins possia la notg anc bain sfradentar las stanzas cun avrir las fanestras. En la regiun da Cuira dettia la notg temperaturas minimalas da 16 grads u en il decurs da l'emna enturn 18 grads. Pli frestg vegnia en l'Engiadina. A Samedan pon ins las proximas notgs quintar cun temperaturas da 3 fin 5 grads e la fin d'emna enturn 6 fin 7 grads.
Pli chaud – pli sitg – pli inflammabel
Cun las fasas extendidas da chaliras vegni era pli e pli sitg. Be l'Engiadin'0ta e l'Engiadina Bassa valitescha la Confederaziun anc betg sco sitg.
