La chalira e sitgira influenzescha plantas, animals ed umans. Nus avain rimnà en quest artitgel tips e trics per vegnir meglier atras il temp da chalira e restar saun.
- Tegnair frestga l'abitaziun cun ventilar endretg
- Baiver avunda ed endretg
- Evitar lieus chauds
- Sfradentar sut la duscha tievia
- Sfradentar las giugadiras dal maun
- Purtar vestgadira adattada
- Durmir cun rauba da letg glischna
- Metter ord funcziun apparats electrics
- Auzar la toleranza da la chalira cun odurs, colurs e suns
Ventilar endretg
Ina strategia da ventilaziun effectiva è decisiva per tegnair la chalira giuadora. Il suentermezdi èsi normalmain il pli chaud. Per ch'i restia frestg en l'abitaziun u il biro vali la paina da dar aria sur notg u la damaun baud. Ventilaziun traversala, pia l'avertura da fanestras visavi procura per in svelt barat d'aria. Avant ch'i vegn pli chaud ordadora – enturn la bun'ura a las set – serrar tut las fanestras ed er ils barcuns.
In ventilatur po far in zic pli agreabla la temperatura en stanza. Dentant adatg: Betg drizzar il ventilatur directamain sin il culiez u sin il chau. Uschiglio pon ins tschiffar in dafraid. Ina brisa miaivla vi dals pes u vi da las chommas po era gia gidar durant ina notg chauda da stad. Tgi che dovra la climatisaziun na duai betg programmar quella pli fraid che sis grads sut la temperatura externa – era quai per evitar in dafraid.
Bavrondas tievias
Era sch'i carmala da baiver in'aua u ina soda fraida cun quadrins da glatsch n'è quai nagina sfradentada optimala. Er sch'il sentiment è agreabel, poi er avair effects secundars, numnadamain in gramfli dal venter. Lura piglia il corp si pli pauc liquid.
Meglier èn bavrondas tievias u almain mo levamain sfradentadas senza zutger e senza alcohol. Per far in zic pli gustus l'aua pon ins er agiuntar in zic citrona u schentsch. Ch'il corp dovri dapli energia per stgaudar si l'aua fraida e ch'ins sua perquai dapli, è dal rest in mitus.
Durant dis fitg chauds duain ins almain baiver var 2,5 liters aua – tgi che sua bler perfin dapli. A persunas che lavuran ordador en la chalira cusseglia la Suva da baiver mintga 20 minutas 2,5 dl aua per evitar in deficit da liquid.
Evitar lieus chauds
Las temperaturas varieschan fitg, tut tenor regiun climatica, autezza sur mar ubain vent e numerus auters facturs. In dals lieus ils pli chauds en Grischun è Biasca – e quai ord plirs motivs. Il lieu è be var 280 meters sur mar. Plinavant na datti nagin aual u lai pli grond en vischinanza. Quels gidan numnadamain da rinfrestgar. Plinavant è la vallada relativ stretga. Pli stretga vul dir pli pauc volumen d'aria – ed uschia pli pauc aria ch'il sulegl sto stgaudar.
Pli gugent ina duscha tievia ch'in sigl en l'aua fradaglia
Strusch insatge è pli carmalant durant dis da stad chauds ch'in sigl en l'aua fraida. Dentant adatg: Quella po augmentar la pressiun dal sang e chaschunar in schoc. Ultra da quai sa tiran ils vaschs ensemen e tegnan uschia la chalur en il corp. La consequenza: suenter ch'ins è sfradentà, suan ins anc pli fitg ch'avant.
Perquai vali la paina da far ina duscha tievia e suenter betg sa sientar dal tuttafatg. Uschia po l'aua svapurar, quai che extira energia dal corp ed ins sa senta frestg.
Sfradentar las giugadiras dal maun
Il tric vegl ed enconuschent: Tegnair per in curt temp las giugadiras sut aua fraida. Cunquai che las avainas e las arterias èn circumdadas là da pauca pel, pon ins sfradentar effectivamain il sang che circulescha en il corp.
Vestgadira lunga e lucca
E tge trair en? Il meglier vestgadira curta? Na. Pel niva sa stgauda numnadamain pli spert che pel cuverta. Ideal è vestgadira lucca. Uschia po l'aria circular, e quai gida da restar pli frestg. E sco material il meglier tscherner mangola, bambus u glin e betg material sintetic.
Vestgadira clera reflectescha dapli radis dal sulegl – ella na vegn pia betg uschè chauda sco vestgadira pli stgira. Vestgadira stgira protegia dentant meglier cunter ils radis dal sulegl. Omaduas variantas han pia in avantatg. Ed er impurtant è da proteger il chau dal sulegl.
Durmir cun rauba da letg glischna
La tscherna da la rauba da letg po far ina gronda differenza. Ina rauba da letg fitg glischa da mangola da satin, en il cas ideal en tuns verd-blaus, è sa mussada sco spezialmain effectiva en in studi. La taila glischa po manar davent meglier chalur che flanella grossa. Il material glisch ha contribuì marcantamain al bainstar dals probands.
Metter ord funcziun apparats electrics
Apparats electrics procuran per ina chalur supplementara – e quai schizunt cura ch'els èn en modus da spargnar energia. Perquai vali la paina da duvrar uschè paucs apparats sco pussaivel e chargiar els la saira u la notg.
Auzar la toleranza da temperatura
La temperatura resentida endadens sa lascha sbassar per 1 fin 3 grads, era senza climatisaziun. La scol'auta da Lucerna ha fatg in studi experimental en ina chasa da tgira cun persunas fitg attempadas. Perscrutadra da design ed architecta d'interiurs Ute Ziegler ha accumpagnà il studi, e dat tips pratics co reducir stress da chalira en il mintgadi.
Odurs giogan ina rolla surprendentamain gronda per noss bainstar termic. En il rom dal studi èn vegnidas manadas differentas odurs sco mentol, menta, citrona e rosmarin en las stanzas. Il studi mussa che questas odurs han in'influenza considerabla sin l'uschenumnà confort termic.
Il mentol activescha recepturs da fradaglia sin la pel, quai che creescha in sentiment da pseudofrestgentada: ins percepescha in sentiment da sfradentada, senza che la temperatura sa midia propi. La perscrutadra Ute Ziegler sezza nizzegia rosmarin e vul maschadar citrona cun mentol per avair in effect da sfradentar anc pli ferm.
I dat blers studis che cumprovan l'influenza da las colurs sin la psica umana e sin il bainstar. Cun applitgar intenziunadamain questas enconuschientschas en la concepziun d'interiurs sa lascha crear in ambient pli frestg.
La regulaziun da la temperatura po per exempel vegnir influenzada d'ina colur da paraid u da glisch correspundenta. Tar glisch blauenta, alva fraida han las probandas ed ils probands stimà la temperatura da la stanza signifitgantamain pli bassa che tar glisch alva chauda.
Era suns han in'influenza sin la regulaziun da la temperatura. Quai na capita betg a moda fisicala, mabain sur process psicologics e neuronals. Noss tscharvè cumbinescha cuntinuadamain infurmaziuns da differents chanals sensitivs.
Caneras pon en quest connex chaschunar aspectativas ed emoziuns che midan danovamain noss sentiment da temperatura. Uschia pon ramurs sco aua u tuns da la natira contribuir ad ina toleranza da chalur augmentada.