Per il mument èsi sitg en Svizra, dentant il pli sitg èsi en il Grischun. Il mais avrigl ha numnadamain purtà memia pauca plievgia.
La consequenza è ch'il privel d’incendis da guaud crescha. En l'entir chantun èsi da far attenziun. Dentant, las regiuns ch’èn per il mument il pli fitg periclitadas èn Zernez, Scuol-Valsot e la Val Müstair. La plievgia avess tenor Mauro Hermann dad SRF Meteo bainglaiti da vegnir, dentant na quinta el betg cun blera plievgia en questas regiuns, be paucs milimeters – cun uradis ed urizis possia per part dentant er dar dapli. Er en tschellas regiuns dal Grischun na quinta l'expert dad SRF Meteo betg che la situaziun da sitgira vegnia a sa calmar, auter che en il Mesauc – là vegn quintà cun dapli plievgia.
Uschia ch'igl è vinavant da dar adatg cun far fieu en il liber. En bleras regiuns dal Grischun èsi actualmain scumandà da far fieu, auter sch'igl ha fuclars existents. Quasut datti ils detagls:
