Per il mument èsi sitg en Svizra, dentant il pli sitg èsi en il Grischun. Il mais avrigl ha numnadamain purtà memia pauca plievgia e vitiers vegn anc che l'enviern ha purtà pauca naiv.
La consequenza è ch'il privel d’incendis da guaud crescha. Cunzunt il pastg, feglia e roma da l'onn passà possian pigliar fieu fitg svelt, di Andrea Kaltenbrunner da l'Uffizi da guaud e privels da la natira. En l'entir chantun èsi da far attenziun.
Dentant, las regiuns ch’èn per il mument il pli fitg periclitadas èn Zernez, Scuol-Valsot e la Val Müstair. Che gist quellas regiuns sajan pertutgadas il pli ferm na fa betg surstar il responsabel dal chantun. L'Engiadina haja en general pli pauca plievgia e sche quai sa cumuleschia lura anc cun in avrigl fitg sitg sco quest onn, sa mussia la problematica là spezialmain. Vitiers vegn tut tenor anc il vent che sienta tut anc pli fitg.
Cunzunt feglia, pastg e roma da l'onn passà pon pigliar fieu fitg svelt.
La plievgia avess tenor Mauro Hermann dad SRF Meteo bainprest da vegnir, dentant na quinta el betg cun blera plievgia en questas regiuns, be paucs millimeters – cun uradis ed urizis possia per part dentant er dar dapli. Ma per bler dapli che per bagnar la surfatscha na tanschia betg. Er en tschellas regiuns dal Grischun na quinta l'expert dad SRF Meteo betg che la situaziun da sitgira vegnia a sa calmar, auter che en il Mesauc – là vegn quintà cun dapli plievgia.
Uschia ch'igl è vinavant da dar adatg cun far fieu en il liber. En bleras regiuns dal Grischun èsi actualmain scumandà da far fieu, auter sch'igl ha fuclars existents. Ma er cusseglia Andrea Kaltenbrunner dad esser precaut il mument:
- sch'i sgolan sbrinzlas – immediatamain ir suenter e stizzar ellas
- sch'igl ha bler material sitg enturn il fuclar – pli gugent desister da far fieu
- betg bittar davent cigarettas betg dal tuttafatg stizzadas
Qua sut datti ils detagls da la situaziun actuala:
