L'Uniun grischuna da skis è sa furmada da nov avant bun tschintg mais. A la testa è Barbara Janom Steiner ch’ha surpiglià il presidi da Gaudenz Bavier. Part da la suprastanza fan tranter auter er Adriano Iseppi e Conradin Cathomen.
Ed ils statuts ch’avevan 20 onns èn medemamain vegnids adattads, quai er sin incumbensa da la Federaziun da skis svizra Swiss Ski e dal chantun. Quels cuntegnan da nov in artitgel da doping ed in dad etica. Areguard l’etica è quai cunzunt er stà necessari perquai ch’in trenader dal BSV aveva mulestà atletas tranter 16 e 18 onns psichicamain sco er fisicamain dal 2019 fin il 2023.
Quel è entant vegnì relaschà, sentenzià e viva oz en l'Italia. Tals cas na dastgan tenor Janom Steiner betg sa repeter. Ella na vesa qua nagina toleranza. Ina da sias finamiras è da crear ina atmosfera da confidenza per tuts, funcziunaris, atletas ed atlets ed era geniturs.
Las finanzas vul Janom Steiner sanar cun dapli daners da sponsurs e cun reducir las expensas. Il BSV na vul betg far gudogn, ma almain pudair preschentar in quint equilibrà.