I maletg dal Stadtgarten a Cuira è collià stretgamain cun la scena da drogas. In project da pilot da la citad da Cuira duai uss midar quai. Tenor il suprastant da la citad Simon Gredig è la finamira da revitalisar il parc sco lieu public.
El suttastritga dentant ch'i na saja betg la finamira da stgatschar insatgi.
Sch'il local da consum cumenza bain duai il consum en il spazi public vegnir impedì pli fitg.
Simon Gredig di ch'ins veglia impedir il consum en il spazi public sch'il local da consum funcziunia bain. «Nus na savain betg stgaffir ina gronda purschida chara ed avair il medem mument il medem consum en il spazi public sco avant.»
Part da questa emprova è in Foodtruck mellen da la firma Plan B, nua ch'i dat da mangiar e da baiver mintga di tranter las 11:30 e las 19:00. Davanttiers datti maisas e sutgas simplas, plazza per var 20 persunas.
Sco quai ch'il manader dal project Benjamin Pally di, sajan els era preparads per il cas ch'il project na rendia betg. Simpel na saja la preparaziun dal project betg stada, manegia el.
I dat gronds pregiudizis envers las persunas en il parc.
Ch'ils da Cuira han tscherts pregiudizis envers las persunas en il parc da la citad, di er il suprastant da la citad, Simon Gredig. El haja dentant contact regular cun las persunas dependentas, e la gronda part haja reagì fitg positiv sin l'idea.
-
Bild 1 von 4. Simon Gredig, suprastant da la citad da Cuira. Bildquelle: RTR.
-
Bild 2 von 4. Benjamin Pally, manader dal project da pilot. Bildquelle: RTR.
-
Bild 3 von 4. Bildquelle: RTR.
-
Bild 4 von 4. Bildquelle: RTR.
Ils iniziants da quest project èn pia persvadids che lur project haja success. Sch'ins dumonda la glieud da Cuira audan ins differentas opiniuns.
Jau chat ch'il Stadtpark era gia adina il parc da drogas – da metter in Foodtruck en il parc na vegn betg a midar la situaziun.
Ideas per far anc dapli or da quel parc amez la citad sajan gia dadas. L'emprim stoppia dentant vegnir evaluà sche la purschida vegnia insumma utilisada.