L’Ospital regiunal Surselva guarda enavos sin in onn da fatschenta fitg pretensius. L’onn passà haja l’ospital a Glion fatg ina perdita da 2,4 milliuns francs, suenter in minus da 1,4 milliuns l'onn avant.
Pervi da la stagiun d’enviern cun pauca naiv saja il dumber da pazients staziunars sa reducì per 7%, scriva l’ospital. Il medem temp sajan ils custs s’augmentads en bunamain tut ils secturs. Ils custs tar persunal èn creschids per 3,78%, cumpareglià cun l'onn passà. En pli hajan tariffas insuffizientas ed effects unics influenzà il resultat.
La purschida ambulanta è sa sviluppada positivamain. L'augment en quest sectur mussia che la purschida saja dumandada en la populaziun e vegnia era nizzegiada. Problematic sajan dentant las tariffas memia bassas, che chaschunian ina mancanza da 20-30% tar la finanziaziun. Entras quai na saja en las bleras parts dal sectur ambulant betg pussaivel da cuvrir ils custs.
Pervi da la situaziun finanziala ha l’ospital stuì dumandar las vischnancas purtadras per agid per pudair finanziar il manaschi.
