L'acziunari da maioritad e president dal cussegl administrativ da l'Arena Alva, Reto Gurtner, ha dà invista a RTR concernent las midadas al timun da l'interpresa. Las structuras duain vegnir pli simplas, l'interpresa pli transparenta, uschia sia pretensiun. Ed i na dovria betg tanta glieud al timun è la quintessenza. Co che noss correspondent en Surselva Franco Caviezel vesa la situaziun metta el a lieu en questa analisa.
Emprima surdada ha fatg naufragi
El haja stuì vegnir enavos per far urden, uschia Reto Gurtner. U ditg auter, el è vegnì a far il pumpier, a stizzar il fieu. Quai suenter ch'el aveva bandunà l'operativa da l'Arena Alva avant radund tschintg onns. Il plan da surdar il timun da l'Arena Alva ad in manader da fatschenta ha fatg naufragi tar l'emprima emprova. Sis manaders da gestiun da la direcziun èn ids u han stuì rumir il post entaifer quest temp.
Pertge quai? Tenor l'acziunari da maioritad Reto Gurtner, è la structura vegnida memia cumplexa ed intransparenta. Ina structura ch'ins enconuscha normalmain tar ina cooperativa u tar il stadi. Reto Gurtner è dapi in onn e mez vi da stregliar il manaschi, vi da tagliar davent il grass, sco che l'interprendider visiunari cun ragischs da mazler, manegia. Restadas èn anc trais persunas en la direcziun e davostiers in schef che funcziuna sco cussegliader. Pia Reto Gurtner en persuna che ha la survista da quai ch'el ha durant ils davos 40 onns construì cun enorm success.
Cun agid d'intelligenza artifiziala svelt sco anc mai
Intgins ed intginas han tar il return da Gurtner manegià ch'il piunier dal turissem alpin haja pers la vista per la realitad. Ma quai para d'esser tut auter che la realitad: Reto Gurtner è cun l'agid da l'intelligenza artifiziala uschè svelt sco anc mai. El è cun ses 70 onns en viadi cun in giudizi gist e focus da laser. Quai in'expressiun ch'el dovra adina puspè.
Il dilemma da Reto Gurtner è dentant ch’i na dat betg in segund sco el. Quai sa el pretender da sasez cun dretg giustifitgà, ma era cun in tschert quità. Far che l'Arena Alva funcziuna sco in'ura svizra senza el, è ina gronda sfida. Tschentar si glieud passiunada per la chaussa ch’è betg part da la famiglia, è fitg grev. Ma tar tut ils dubis pon ins era dir: Il schef da l'Arena Alva ha adina puspè mussà: El cumenza là, nua che auters chalan, era sche l'ura fa tictac.
Franco Caviezel
Redactur Surselva