La Regiun Surselva sa dosta per ch’i vegnia er vinavant transportà l’enviern autos sur il Pass Alpsu. Sco la regiun scriva, sa tractia dad ina colliaziun impurtanta en direcziun vest. Quai tant per indigens sco er turists. Enstagl da stritgar questa purschida, pretenda la Regiun Surselva da meglierar la purschida dal traffic public en Surselva.
Concret pretenda la Regiun Surselva ch'i dettia in tact da mes'ura tranter Sedrun respectiv Dieni enfin Cuira e quai senza stuair midar tren a Mustér. Plinavant duain er ils curs da posta vegnir colliads en in tact da mes'ura. Sco segund vul la regiun er colliaziuns tardivas, inclusiv trens da notg sur l'Alpsu, tranter Mustér ed Andermatt.
Per nus sco vitg periferic èsi impurtant d'avair bunas colliaziuns dal traffic public en direcziun Andermatt e Cuira.
Colliaziun na rendia betg
La Viafier Matterhorn-Gottard aveva annunzià il schaner ch'ella na porschia betg pli il transport d'enviern a partir dal 2023. La raschun saja che la relaziun tranter custs e niz na constettia betg. Dapi il 2011 vegnan transportads mintg'enviern circa 2’100 autos sur l'Alpsu.
