Ils ultims mais ha ina gruppa da lavur elavurà l’idea d’introducziun in sistem digital per l'access a la butia ed il café dal vitg da Curaglia en la Val Medel. Il verdict a la radunanza generala è lura stà cler. «Da radund 40 commembras e commembers ch’èn sa participads han sulettamein dus refusà in sistem cun access digital. Ils auters èn stads da l'avis da far quest pass», ha ditg Philippe Steiger, president da la Pro Stizun Val Medel, envers la FMR.
Butia cun access digital sco a Surrein e Vuorz
La gruppa da lavur cun quater dels da la val ha preschentà sia lavur cun il num «PrimA+ Hybrid 24/7». La lavur è sa basada sin ina retscherca tar ils indigens e secundindigens. Dus terzs da 125 persunas ch’èn sa participadas a la retschertga han beneventà in sistem dubel cun temps d’avertura ed access digital. Parallelmein è la gruppa s’interessada tar quater fatschentas che disponan gia d’in sistem digital d’access, tranter auter las stizuns a Surrein e Vuorz. Las experientschas fatgas en quests lieus mussia ch’in sistem digital per il temp che la stizun n'è betg occupada cun persunal èn positivas.
La suprastanza da la Pro Stizun Val Medel beneventa la soluziun cun trais cundiziuns. «La finanziaziun sto reussir senza capital da l’associaziun, la segirtad en la stizun sto esser garantida da tut temp e la gruppa da lavur sto cuntinuar cun ses engaschament enfin ch’il sistem è en funcziun», di Philippe Steiger. Plinavon di el: «Nus prendin fetg serius las resalvas dal persunal e d’autras persunas pertutgand la segirtad. La glieud che va en la stizun ni en il café sto sa sentir segira.»
Cun persunal e digital
La gruppa da lavur cun Giusep Flepp a la testa vul che la stizun è occupada vinavant cun persunal pli u main sco la purschida actuala. Ordaifer quest temp duai dar in access digital. Cun far quest pass duain plazzas da lavur vegnir mantegnidas e la svieuta augmentada. Entras quai duai la stizun daventar pli attractiva. «La stizun ed il café èn era in lieu da sentupada. Mo nus stuein era procurar ch’il manaschi saja finanzialmein supportabel. I drova soluziuns per impedir deficits il futur», di Philippe Steiger. L'onn da fatschenta 2025/26 ha la stizun gì ina leva digren da la sveulta e la fin finala hai dà ina sperdita en il quint da manaschi. La sperdita ha bain pudì vegnir reducida dapi il 2023, ma il preventiv per 2026/27 quinta era cun in deficit. «Nus avain cumenzà bain il nov onn da fatschenta, mo sche l’aura la stad e l'atun è mala, faschain nus damain svieuta», constatescha il president.
La realisaziun dal sistem digital saja pussaivel en il decurs dal 2027. Ils custs èn calculads cun radund 60'000 francs. La gronda part da questa summa absorbescha il mobigliar. I dovria novas stgaffas per tubac ed alcohol ni era per adattar il sistem da cassa e biro. Radund 15'000 francs èn calculads per segirtad, alarm e surveglianza. Sco partenaris per la finanziaziun vesa la gruppa da lavur per exempel l'Agid da muntogna ni novas commembras e commembers ed in crowdfunding sco era atgnas prestaziuns. La finamira è clera: Salvar la stizun ed il café sco lieu d'inscunter per giuven e vegl e sco pussaivladad da cumpra en il vitg.