Suenter bun in onn da construcziun è la nova chasa da dimora per persunas cun impediments vegnida averta uffizialmain. Gia ils 9 da fanadur èn ils novs abitants e las novas abitantas arrivadas en il bajetg da trais auzadas. En tut porscha la chasa plaz per 12 persunas, actualmain vivan 9 persunas en il bajetg ch'è anc senza num uffizial.
En tut las quatter auzadas hai mintgamai quatter stanzas cun in agen bogn. Vitiers datti per auzada ina stiva, ina cuschina ed ina veranda cuminaivla. In balcun tort orasum il suler vers nord duai esser ina nischa, sch'ils abitants u las abitantas han il giavisch da sa retrair. Quai ha explitgà Barbara Hofmann, la manadra da la partiziun abitar e lavurar e commembra dal directori da la Casa Depuoz.
In mais avant ch'ils abitants e las abitantas han midà chasa, han els gì la chaschun da visitar la nova dimora. E davent da lura hajan els bunamain mo pli discurrì dal midar e dal pachetar, ha Barbara Hofmann raquintà ad RTR. E la midada haja lura funcziunà dètg stupent.
Mintga abitaziun funcziunescha per sasezza.
Fin uss eran tut ils 9 cussadents actuals ensemen, uss èn mintgamai trais en in'abitaziun. E cuschinar, nettegiar e lavar resti – tut saja uss il pensum da l'entira gruppa.
-
Bild 1 von 6. La chasa nova a Sedrun. Bildquelle: FMR.
-
Bild 2 von 6. Mintga abitaziun ha uschè ina stiva. Bildquelle: RTR.
-
Bild 3 von 6. La cuschina è spaziusa. Bildquelle: RTR.
-
Bild 4 von 6. Gabriela Tomaschett-Berther beneventa las visitas a chaschun da l'avertura uffiziala. Bildquelle: RTR.
-
Bild 5 von 6. Benedì il nov bajetg ha l'avat Vigeli Monn da la claustra da Mustér. Bildquelle: RTR.
-
Bild 6 von 6. Da la regenza grischuna è Marcus Caduff stà preschent. Bildquelle: RTR.
Ils lioms tranter la Casa Depuoz a Trun e la nova dimora a Sedrun stoppian vegnir pli ferms. Cun esser uschè lunsch in ord l'auter na sa vesian ins betg uschè savens, ha Barbara Hofmann declerà. Discussiuns da manar ils dus manaschis pli datiers in da l'auter hajan ins fatg. Dentant haja la vischnanca da Tujetsch purschì il maun, era per salvar plazzas da lavur. Ed uschia saja la nova dimora vegnida realisada a Sedrun.