La communicaziun che ils Stadis Unids da l'America pretendan da la Svizra in dazi da 39% sin blers products ha schoccà bain inqual interpresa svizra. Uschia era la Conditoria Sedrun-Switzerland da Reto Schmid (51).
Quella decisiun ha fatg gronds quitads a mai.
Ad el eri numnadamain reussì da far contacts concrets cun in'interpresa dals Stadis Unids da l'America per pudair furnir là regularmain turtas pitschnas. Dacurt han ils Americans decidì da sbassar il dazi da 39 sin 15%, ma era quel resta ina bariera. «Ensemen cun la differenza da valuta ch'è sa dada dapi l'entschatta da l'onn dal franc svizzer sin il dollar, discurrin nus anc adina d'in surpli da custs da radund 30%. Per nus è quai simplamain memia bler», di Reto Schmid.
Sin fundament da contracts fatgs avant l'augment dal dazi ha sia interpresa pudì furnir dus containers plains cun tschient millis turtas pitschnas als Stadis Unids da l'America. Actualmain na vegn dentant betg furnì dapli.
Betg l'emprima crisa
Il manader da fatschenta tuatschin iniziativ n'ha dentant betg laschà starmentar da las novitads negativas da l'autra vart da la mar: «Dapi che nus avain avert il bajetg nov mez da l'onn 2020 avain nus surmuntà tschintg crisas: Corona, ils problems da pudair importar en Corea dal Sid perquai ch'il Canal da Suez era vegnì serrà, la guerra en l'Ucraina, la guerra a Gaza ed ussa ils problems dals dazis cun ils Stadis Unids da l'America.
Entaifer 24 uras è il pretsch per nitscholas creschì per il dubel.
Cun products en Corea dal Sid – per dir in exempel – faschevan nus ina fitg bella svieuta. Quella è crudada d'in di sin l'auter perquai ch'ils pretschs cun il transport en containers èn s'augmentads considerablamain.» Vitiers saja vegnida ina schletta racolta da nitscholas.
En contact cun l'India
En il decurs dals davos tschintg onns ha Reto Schmid diversifitgà sia paletta da products. Ed el ha era tschertgà nova clientella. «Nus furnin products en China e cun interpresas da l'India essan nus en contact. Cun quellas terras datti ina cunvegnientscha che permetta a nus d'importar là senza dazi», di Reto Schmid. Grazia a la preschientscha sin fieras internaziunalas saja reussì da far buns contacts: «Là essan nus vegnids pledentads da fatschentas da l'India. Nus n'avain gnanc stuì tschertgar sezs ellas.» Per la fiera en l'India vegnan medemamain turtas pitschnas en differentas variantas en dumonda.
Diesch collavuraturs dapli
«Sper las turtas pitschnas pudain nus furnir blers products da tschigulatta a las pli differentas interpresas en Svizra. Latiers tutgan Migros, Coop, Lidl ed Aldi», di Reto Schmid. Schegea che la producziun per ils Stadis Unids da l'America è crudada davent dal tut, na manca la lavur propi betg: «Il november e december avain nus engaschà diesch persunas dapli per pudair dar il dumogn a tuttas empustaziuns. Il mument essan nus en tut 55 collavuraturas u collavuraturs.»
Sper la furniziun da products als detaglists gronds, sviluppescha la Conditoria Sedrun-Switzerland era products per differenta clientella. «Nus avain il certificat da qualitad internaziunal persuenter. Gist a fatschentas pitschnas che n'han betg quel u era betg confisiers, pudain nus porscher noss servetsch», declera il possessur e manader da fatschenta.
Nus essan gia ussa vid producir lieurs.
La strategia cun ina clientella pli vasta e diversifitgada sa paja, ma era quella cun dapli products. Ina da las petgas èn las lieurs da Pasca: «L'entschatta da favrer bandunan las emprimas 280'000 lieurs nossa fatschenta ed anc ina giada tantas vegnan furnidas pli tard ordaifer u vendidas da nus.»
Festivà il giubileum da 60 onns
Dal reminent: Ils 15 da november 2025 ha la Conditoria Sedrun-Switzerland a Sedrun pudì festivar il giubileum da 60 onns.
En la vegliadetgna da 18 onns e cun la patenta da pasterner en satg aveva il bab da Reto Schmid, Marcel Schmid, avert la fatschenta a Sedrun e silsuenter extendì ella successivamain ensemen cun sia consorta Adelina Schmid. Dapi 21 onns maina Reto Schmid cun success l'interpresa.