La premiera dal toc «Fausta Piuniera» è gartegiada. Il public ch'è sesì sut in tetg ha pudì giudair ina inscenaziun moderna. Uschia èn las radund 75 minutas passadas svelt e senza incaps ed era la plievgia ha spetgà fin ch’il toc è stà a fin. L’inscenaziun è stada fitg divertenta e las scenas han purtà ins 150 onns enavos en il temp, nua che la prominenza or dal mund da la politica, da l’art e da l’economia vegniva a far vacanzas tar la Fausta Capaul a Breil.
Ma betg mancà han era las parallelas en il temp dad oz, cun il viturin che prenda il public per il maun e maina el tras la saira. Surtut plaschì han ils costums ed ils vestgids da las acturas ed ils acturs che laschan propi reviver in temp da piunier, ma era in temp da signuras e signurs sin la tribuna davant l’ustaria Fausta Capaul.
Inscenar teater en il liber è ina sfida
Ina inscenaziun en il liber è adina ina sfida, surtut quai mument cura ch’ins vegn da las salas d’exercizi en dadens per l’emprima giada sin il palc, di il reschissur dal toc David Flepp. Ma quai saja er in bel mument, perquai ch'ins vesia tuttenina chaussas ch’ins n'ha betg spetgà e quai fetschia spezial inscenar in toc en il liber.
L’inscenaziun è ina collascha en tschintg scenas singulas che giogan tant en il passà sco er en il preschent. Mintgamai vegnan osps cun la charrotscha a far vacanzas e Breil tar la Fausta Capaul. Las acturas ed ils acturs da l’uniun dramatica a Breil han da schluitar en differentas rollas e giogan ina giada per rumantsch e l’autra giada per tudestg, ma era dunnas che giogan umens e viceversa. Quai saja sia filosofia preferida co giugar teater, di David Flepp, era ch’ins improviseschia quasi fin a la premiera. Quai sa mussa era che quai na saja anc betg propi cler co il toc fineschia la finala, di il reschissur.
Il toc sa basa sin funtaunas secundaras
La basa dal toc da teater èn las funtaunas secundaras dals osps ch’han visità la Fausta Capaul, surtut il cudesch d’osps ed il diari da Georg Finsler, quai sulet per numnar duas funtaunas. Il motiv principal per quai agir è ch'i na dat nagin relasch en scrit da la Fausta Capaul. Perquai han ins cun quels tschintg maletgs empruvà da mussar la tenuta da quest temp ed il cumenzament dal turissem a Breil. Ina dumonda resta averta – sa mussa la Fausta Capaul era sin il palc?
