Ils participants e las participantas dal Freestyle festival han gì la pussaivladad da visitar curs pratics davart lavinas. Il terz di, la sonda, steva suentermezdi surtut la teoria e la decisiun individuala en il focus.
Ir, guntgir u volver
Avant prender ina decisiun ston tut las persunas che van cun skis u cun aissa en la naiv entira – quai vul dir ordaifer las pistas preparadas – esser conscientas: il ristg d'ina lavina è adina preschent. Era quest enviern cun pauca naiv.
Durant ses referat la sonda suentermezdi en l'ustaria Nagens a Flem explitgescha il guid da muntogna da professiun, Florian Möhl, co ch'ins po sa preparar meglier per aventuras ordaifer la pista.
Il guid da muntogna da 41 onns mussa als participants dal Freeride festival cun exempels concrets co leger correctamain il bulletin da lavinas, tge signals observar en il terren e tge mesiras da precauziun prender.
Igl è fitg impurtant ch'ins sa sviluppescha vinavant. Il meglier è da cumenzar cun in terren pli simpel e lura augmentar la difficultad. U ch'ins accumpogna persunas ch'han gia dapli experientscha.
Fitg impurtant è da far ina buna preparaziun a chasa. Quai è essenzial per la segirezza ordaifer la pista. La basa da tut saja la finala ina buna scolaziun e sensibilisaziun, di Florian Möhl.
-
Bild 1 von 4. L'emna passada ha il emprim Freeride festival gì lieu a Flem e Laax. Bildquelle: RTR.
-
Bild 2 von 4. Lieu d'inscunter era tranter auter la Freeride Base a Nagens. Bildquelle: RTR.
-
Bild 3 von 4. Ina broschura duai sustegnair tar la valitaziun da las costas. Bildquelle: RTR.
-
Bild 4 von 4. Florian Möhl explitgescha co ch'ins po sa preparar sin in'aventura ordaifer la pista. Bildquelle: RTR.
Sper ina buna scolaziun dovri natiralmain era in bun equipament, quai munta in apparat da tschertgar en lavinas, ina pala ed ina sonda, di il guid da muntogna.
Cifras constantas
Sch'ins dat in sguard sin las cifras da l'Institut federal per la perscrutaziun da naiv e lavinas SLF dals ultims 20 onns, lura èn ils accidents mortals en connex cun lavinas restads constants. En media ha dà 21 morts per onn. Quella cifra è ils ultims onns restada pli u main sin il medem nivel, era cura che la popularitad da sports ordaifer la pista è s'augmentada.
Tenor Florian Möhl po ins declerar quai cun ina meglra prevenziun ed era cun ina meglra savida da la glieud che va ordaifer la pista.
Jau hai l'impressiun che las persunas sa fatschentan meglier cun la materia. Da l'autra vart vegn era fatg dapli prevenziun da las regiuns da skis, lavinas vegnan siglientadas e costas serradas. Ins fa stim che il terren daventia pli segir.
In tschert ristg vegn adina a restar, concluda Florian Möhl. Dentant po ins diminuir quel cun ina buna preparaziun e cun ina sauna raschun. Uschia ch'era el sco bab da dus uffants pitschens po persequitar cun buna conscienza sia passiun en la naiv entira.