En la staziun da val dal Flemxpress stattan las bikeras ed ils viandants en colonna. Las pendicularas als duain purtar sin la muntogna. Sin l'emprima egliada para tut in pau futuristic: Tschintg portas, portas sco portas d'ascensurs, mainan tar las cabinas da las pendicularas, ch'han mintgamai plaz per 10 persunas.
Duas da tschintg portas en funcziun
Tar nossa visita èn duas da quellas tschintg portas en funcziun. Sper nus stat ina mamma en colonna cun sia amia e quatter uffants. Ina colonna survesaivla. La dunna manegia ch'ella saja qua l'emprima giada, ella sa legria ed i vesia or fitg modern.
Avant las duas portas d'ascensur stat ina collavuratura cun ina gronda consola. Sin quella datti per mintga destinaziun in buttun. La dunna giuvna beneventescha ils giasts, smatga il buttun da la destinaziun giavischada, guarda che tut funcziunia.
Quatter destinaziuns, bainbaud tschintg
Sin dus gronds visurs sur las duas portas ch'èn en funcziun, è da vesair la destinaziun. Foppa, Startgels, Segnes u Nagens Sura. L'entschatta december vegn averta la tschintgavla secziun, che maina si Cassons.
-
Bild 1 von 3. La collavuratura dal Flemxpress beneventa ils giasts, smatga il buttun da la destinaziun giavischada e guarda che tut funcziuna. Bildquelle: RTR.
-
Bild 2 von 3. Sin in visur sur la porta tar la cabina ves'ins il num da la destinaziun, quantas plazzas da seser ch'èn anc libras ed il countdown enfin che la porta sa serra. Bildquelle: RTR.
-
Bild 3 von 3. La collavuratura po smatgar sin ina consola la destinaziun giavischada. Bildquelle: RTR.
Il Flemxpress è l'emprima telecabina «on demand» dal mund. Ella na va betg a la radunda, mabain mo sche giasts la dovran. Quai duai spargnar energia e far ina parita moderna. Ma adina na funcziuni betg sco ch'i stuess.
Tge manegian visitaders e visitadras?
Tge èn lur experientschas?
-
Bild 1 von 7. Donat Tschuor, Cuira. Differentas. Tscherts dis bunas, lura funcziunescha tut bain. Auters dis avain nus da spetgar. Ier na gieva insumma nagut. Lura avain nus spetgà duas uras. Bildquelle: RTR.
-
Bild 2 von 7. Pia Staub, Richterswil. Nus enconuschain il Flemxpress dapi l'entschatta, dapi ch'el va e nus avain era sentì sias «malsognas d'uffants». Ma en il fratemp essan nus giasts cuntents. Gea, cler, ins ha probablamain schon pensà ch'i vegnia a funcziunar pli svelt. Quai è segir uschia. Da l'autra vart èsi halt in nov product, qua ston ins avair ina tscherta chapientscha. Bildquelle: RTR.
-
Bild 3 von 7. Nicolas Lehner, Turitg. Oz è l'emprima giada che nus giain cun il Flemxpress. L'enviern passà avain nus guntgì el in pau, perquai che nus avain adina puspè udì ch'el stettia airi ed haja problems. Ma jau crai che l'idea saja fitg lessiga. E tecnicamain sco inschigner è ella geniala. Jau hai mirveglias co ch'i funcziuna lura l'enviern e ch'i funcziuna speranza meglier. Bildquelle: RTR.
-
Bild 4 von 7. Martina Fuchs, Berna. Anc sun jau betg ida cun el. Jau ma legrel. Ed uss che jau ves quai, chat jau ch'i saja fitg modern. Bildquelle: RTR.
-
Bild 5 von 7. Jaro Tschuor, Cuira. Puh... Mintgatant stat el airi fitg ditg. Mintgatant vai bain. Pia, ina giada uschè, ina giada uschia. Bildquelle: RTR.
-
Bild 6 von 7. Sarina Bürer, Laax. Fin uss è mia experientscha en sasez adina stada buna. Nus avain atgnamain adina gì cletg. Jau hai dentant era schon udì auter. Ma cura che nus essan ids cun il Flemxpress funcziunavi. Bildquelle: RTR.
-
Bild 7 von 7. Jan Eberhard, Fällanden Turitg. Mias experientschas cun il Flemxpress èn che jau hai il sentiment ch'i na giaja anc betg dal tut senza incaps. Quai custa temp. Ed i na custa gea era betg gist pauc dad ir si qua. Bildquelle: RTR.
«I na custa gea er betg gist pauc dad ir si qua» di in giast
Per cumparegliar: Cun la posta custi da Laax fin Nagens ed enavos 16 francs. E tar il Flemxpress paj'ins sco pedunza senza abunament da mesa taxa 105 francs, per ir fin sisum, si Nagens Sura e puspè engiu. 70 francs per ina via. Ina viandanta ch'jau inscunter si Segnes e che sa protegia dal sulegl cun ina chapitscha cotschna, manegia perquai: «Igl è stà memia char. Nus avain ussa pudì vegnir per la mesadad dal pretsch sur Crap Sogn Gion ed essans chaminads fin qua a Segnes. Ed ussa essan era qua.»
Sia experientscha cun il Flemxpress saja stada che l'enviern saja stà difficil. I saja ì fitg plaun cun blers temps da spetga. Ed ella agiunta era «Ma cura ch'ins va e cura ch'i va, lura èsi schon in'experientscha! La survista e tut quai. Quai ma plascha!»
Ses partenari agiunta che las duas giadas ch’el saja ì si, saja ina giada mo ì en tempo da chaminar ed ina giada saja stà da star en «senza fin». Per el saja in misteri co che quai possia esser. I saja catastrofal. Sin la dumonda sch’el na vegnia betg pli ad ir cun il Flemxpress di l’um da Basilea. «Pir cura ch'i funcziuna.» El speria ch'i vegnia a funcziunar cura che tut las secziuns èn avertas.
Tranter hightech e malsogna d'uffants
Il Flemxpress è ina innovaziun ch'empermetta d'esser flexibel, effizient, cun pli paucas emissiuns. E propi, sche tut funcziuna – uschia sco ch'igl è stà il cas tar mia visita – lura para il sistem empermettent. Per il mument tuna quai dentant in pau d'aventura – tranter hightech e malsognas d'uffants, tranter sentiment da piunier e muments da frustraziun.