«Suenter 34 bels ed intensivs onns cun bun success essan nus sa decidids da serrar noss manaschi per ir novas vias.» Quai han Toni e Renata Goldmann scrit il glindesdi en ina circulara a la clientella che la pasternaria furnescha cun ses products. «Cun in egl riend ed in larmant serrain nus l'ischa ils 24 d’october 2026», scrivan els. Fin il davos di s’engaschian els cun tutta forza e plaschair per la clientella. Fin lura sperian els era da dastgar servir vinavant la clientella cun lur products. Serrà vegn er il café.
Sco quai che Toni e Renata Goldman din, n'èsi betg reussì da chattar ina successiun per il manaschi: «Nus avain manà plirs discurs per chattar ina soluziun, ma la fin finala èn quels restads senza in resultat positiv. Chattar insatgi che maina in manaschi da pasternaria e patissaria sco nus avain è fitg grev, surtut en la periferia.»
Toni e Renata Goldmann han surpiglià la pasternaria l'emprim da schaner 1993. Els èn stads la terza generaziun da la famiglia Goldmann en il manaschi. Josef ed Elisabeth Goldmann èn stads l’emprima, Peter e Käthy Goldmann la segunda. Avant deva quai gia ina pasternaria en il medem lieu.
La Pasternaria Goldmann è la davosa da sia branscha a Mustér. Cura ch’ella serra las portas en set mais na dat quai nagina pasternaria pli a Mustér.
1993 eran nus trais pasterners a Mustér. Sper nus eran quai era las famiglias Herger e Monn.
Il regress da pasternarias n'è dentant betg mo da constatar a Mustér. Deva quai avant 30 onns anc radund in tozzel pasternarias da Sedrun fin a Glion, èsi oz anc la mesadad. «Ils temps èn sa midads. Ils onns 1970 fin 1990 èn stads turisticamain fitg buns. Dapi lura è ina rotscha hotels svanì», sa regordan Renata e Toni Goldmann.
Ma lura laschan era bleras e blers – er indigens – trametter ozendi la rauba directamain en chasa tras servetschs da detaglists gronds. Quai ha era gì in effect sin il dumber da collavuraturas e collavuraturs da la Pasternaria Goldmann: «Ils megliers onns avevan nus tut en tut 10 plazzas da lavur cumplainas, oz èn quai anc radund 700 pertschients da plazzas.»
En il lieu nua che la Pasternaria Goldmann e ses café sa chattan oz a la Via Cavardiras en il center dal vitg a Mustér, vegn erigida ina surbajegiada. Ils bajetgs vegls vegnan spazzads. Tut en tut vegn quai a dar radund 10 abitaziuns, la gronda part da 3½ stanzas. La planisaziun persuenter è gia avanzada.