Christian Laesser, il giat è or dal satg. Il pretsch da cumpra per l'infrastructura al culm da Flem, Laax e Falera è 94,5 milliuns francs. Tge schais Vus da questa summa?
Ord mia vista è quai in pretsch fair, quel è pli bass che quai ch'jau avess spetgà cun guardar sin il quint annual. Il pretsch cumpiglia l'infrastructura da culm – l'Arena Alva ha dentant er anc bler ch'è en la vallada, quai n'è betg cumpiglià. Quai na dastg'ins betg emblidar.
Suenter la cumpra prenda l'Arena Alva SA a fit l'infrastructura per gestiunar quella – ins fa quint cun in fit da 13 milliuns francs. Co mettais Vus en relaziun questa summa cun la summa da cumpra?
Questa cifra è gnanc uschè decisiva cunquai ch'il tschains da fittanza è variabel sin basa da las amortisaziuns ch'èn necessarias ed ils custs da chapital. Uschia è quai che influenzescha il pli fitg ils custs curclà. Perquai na ston ins betg exnum metter quai uschè fitg en relaziun, sco sche la Finanz Infra stuess purtar sezza tut las amortisaziuns. Quai è ina soluziun eleganta ch'ins po adattar a las relaziuns.
Co declerais Vus quai ch'il pretsch da cumpra è pli bass che quai ch'i vegniva speculà avant la communicaziun – i ha gea num che l'interpresa da Vail Resort avess pajà bler dapli?
Jau na sun betg segir sche Vail Resort avess propi pajà dapli. A Crans Montana ha Vail Resort numnadamain pajà in pretsch exagerà. Sch'ins cumpra insatge vai la finala propi per la summa che vegn pajada – e betg per la summa che pudess vegnir pajada.
I na va betg be per il deal da cumpra mabain anc per dapli. Co valitais Vus en general ils aspects che l'Arena Alva e las trais vischnancas èn sa cunvegnidas.
Igl è ina soluziun eleganta per in problem cumplex. Il problem cumplex è che las trais vischnancas e la regiun èn extremamain dependentas da tge che capita en l'Arena Alva e co e da tgi che quella vegn manada. Questa controlla pon las vischnancas uss surpigliar per part. Il model n'è betg nov: il model da vender e lura dar a fit enconusch'ins er en l'hotellaria, ubain a l'exteriur er tar il dretg da duvrar las raits da viafier. En la branscha da pendicularas è la soluziun dentant schon revoluziunara, almain en questa dimensiun ch'ina societad surpiglia gist tut l'infrastructura da muntogna.
Uss è il suveran da las vischnancas Flem, Laax e Falera dumandà ed ha da decider davart la cumpra. Tge ristgs datti per las vischnancas?
Per las vischnancas èsi central che la maschina da daners al culm funcziunescha bain, ed il proceder planisà segirescha quai. E tge èn ils ristgs? Ord mia vista è il ristg limità. Las vischnancas survegnan ils implants sin la muntogna, ed ellas han cun lur forza finanziala fitg bunas cundiziuns al martgà da finanzas.
Anc ina giada tar il suveran da las vischnancas, che ha sulettamain quatter emnas temp da furmar l'opiniun. N'è quai betg in fitg curt temp?
Jau fetsch la dumonda gist il cuntrari. Tge cumpart da las votantas e dals votants sa fatschenta pli ditg che quatter emnas avant ina tala votaziun cun il cuntegn? Il proceder planisà cun vender e puspè fittar enavos l'infrastructura, quel enconuschan ins numnadamain era d'auters secturs sco las immobiglias.
Tge munta questa via per il spiert d'innovaziun, che l'Arena Alva ha sco davos mussà cun realisar il FlemXpress?
Il construct previs ni fraina ni promova zunt l'innovaziun. Igl è perfin da s'imaginar che l'innovaziun profitass dapli. Sche daners vegnan libers, pon ins impunder quels per sviluppar la fatschenta. La finala dapenda l'innovaziun dentant adina da glieud.
Per finir anc, nua pon ins vesair las schanzas per questa cumpra che vegn uss en votaziun?
La schanza principala è che l'entir manaschi vegn pli independent da singulas persunas. E per l'actur principal dal turissem en la regiun è uss ina schliaziun sin maisa, che segirescha da cuntinuar ils proxims 10, 20 e 30 onns. Ed era sche l'Arena Alva vegniss tuttina ina giada vendida, e fiss lur en mauns esters – avessan las vischnancas vinavant ils elements impurtants en lur mauns.