L'ustaria «Cruna» a Sumvitg - «Nagina ustaria en il vitg è mender che nagina baselgia»

Che bleras ustarias han tut auter che simpel – quai n'è betg in misteri. Ils giuvens han pli e pli pauc interess dad ir en sortida, las uniuns pateschan dad adina pli paucs commembers e commembras – manar ina ustaria en in vitg vegn uschia adina pli pauc rentabel.

Er a Sumvitg è la davosa ustaria stada curt avant stizzar las glischs e quai per adina – grazia a Zita e Norbert Bass è quai auter. 36 onns avevan els manà il manaschi da la «Cruna» a Sumvitg. Avant set onns, avant che ir en pensiun, han els lura surdà la clav ad ina nova locataria. E suenter che quella ha la fin da l'onn decidì da chalar e nagin successur era pront da surpigliar, han ils possessurs spontan decidì da sez puspè manar l’ustaria.

Sch'i fa da basegn, lura avran els immediat las portas da lur ustaria. Saja quai per gruppas da troccas, la giuventetgna ubain il chor maschadà – blers e bleras han il basegn da star da cumpagnia e quai vulan Zita e Norbert porscher a la populaziun da Sumvitg.

L’energia da far quest pass enavos en l’ustaria saja schon plitost vegnida dad ella. Gia sia entira vita ha Zita Bass passentà tranter las paraids da l’ustaria. Ella è creschida si en la «Cruna», ha vis sco ses geniturs han manà l'ustaria sur plirs decennis ed ha lura sezza surpiglià il timun enfin sia pensiun. Ed ussa cun 73 onns – il comeback.

Ed era la populaziun da Sumvitg stima lur engaschi. Schegea che la purschida è mo limitada. Ina ustaria averta è in segn ch'il vitg vivia anc.

Ina schliaziun per l'avegnir n'è per il mument anc betg sin maisa. Che l'ustaria la «Cruna» stuess insacura serrar sias portas dal tuttafatg, vi da quai na studegia nagin gugent. Quant ditg che Zita e Norbert Bass han anc elan dad avrir las portas da l’ustaria – quai stat anc en las stailas. Enfin che quai è lura uschè lunsch, giaudan tuttas e tuts anc pli fitg lur «Cruna».