Il messadi sin la nova pagina d'internet da l'hotel e restaurant Péz Regina sveglia fai e speranza tar ils anteriurs osps ch'èn stads dischillusiunads da l'anteriur ustier. El aveva fiers il menaschi dal tempel en avant passa in onn. Dapi il mars 2026 è il Péz Regina serrà. Ma ussa legian ins: «Cun novs affittaders, ina carta da tratgas concepida da nov e cun cleras uras d'avertura sto l'ustaria e l'albiert dal Péz Regina puspè daventar quai ch'el è gia adina stà.» Ed anc dapli: «Nus vulain crear in lieu d'inscunter viv per il vitg, per osps da la regiun e per visitadras e visitaders da lunsch e da manaivel.»
Dal Radio Piz al Péz Regina
Stephan M. Porchet sa numna il nov ustier e hotelier dal Péz Regina. Sias emprimas professiuns èn stadas cussegliader da relaziuns publicas e schurnalist da radio. Suenter sia scolaziun sco cussegliader da relaziuns publicas è el stà en giuvens onns in dals moderaturs d'entschatta dal Radio Piz Corvatsch. Stephan M. Porchet ha oz 57 onns. El è naschì e creschì si ils emprims onns en l'Engiadina Bassa. La gronda part da sia vita ha el dentant passentà en la Bassa.
La via en la gastronomia
L'onn 1998 è Stephan M. Porchet daventà interprendider independent. El ha surpiglià numerus mandats da cussegliaziun ed ha lavurà dasperas sco moderatur da radio. Tranter auter ha el era manà ina interpresa che venda pulasters dal gril. Dasperas ha el cusseglià interpresas ed ha gestiunà in manaschi da hotel e restaurant a Gottlieben sper il Rain a l'ur dal Lai da Constanza. Quai saja stà ses emprim contact direct cun in manaschi da gastronomia: «Sur pliras staziuns sun jau a la fin finala ma tschentà en Val Lumnezia. Atgnamain sun jau vegnì per guardar ina giada e sun m'inamurà immediat en quella bella cuntrada.»
Normalitad e nagut auter
Stephan M. Porchet è conscient dal fatg ch'il Péz Regina a Lumbrein è ina da las paucas ustarias ch'i dat en ils vitgs lumnezians. «I dovra uras d'avertura ch'èn definidas e che vegnan suandadas. Nus vulain esser in hotel cun circa 20 letgs ed in restaurant cun ina carta da tratgas che pledenta in public vast», di il nov affittader. «Nus vulain esser autentics e part da Lumbrein e da la Lumnezia. Ed uschia vegn jau e mia dunna a gestiunar ensemen cun quatter collavuraturas il Péz Regina.»
Pledentar ils indigens
«Sco restaurant vulain nus era pledentar las indigenas ed ils indigens da Lumbrein, da la Lumnezia e da la Surselva», di Stephan M. Porchet. «Jau sai ch'i vegn ad esser sco tar tut ils auters ustiers novs ina tura sin il fil d'ina muntogna da persvader tanta clientella sco pussaivel da nossa purschida.» Stephan M. Porchet di che dapi la pausa dal coronavirus saja insumma vegnì pli grev per la gastronomia. Er ils pretschs sajan adina puspè in tema cura ch'ina ustaria avra. «Igl è dentant impurtant da restar autentic envers indigens e giasts.»
La maschaida munta
Stephan M. Porchet raquinta da sias numerusas plazzas da lavur cun bellas e main bellas entupadas. El di ch'el haja gist en la gastronomia emprendì bler cun tadlar era las vuschs criticas. Malgrà quai saja reussì da viver sia persvasiun sco interprendider. «Per mai èsi adina ina maschaida da tuttas cumponentas en in manaschi che dattan il resultat. Quai entschaiva cun l'atmosfera dal local e finescha cun il persunal e la qualitad dals menus e da las bavrondas.»
Reavertura il prim da matg
«Tar nus na datti naginas grondas festivitads d'avertura», di l'ustier futur. «A partir dal prim da matg 2026 è il Péz Regina puspè avert e nus salidain cordialmain tut quellas e quels che vegnan.» Il gastronom e cussegliader d'interpresas prognostitgescha ch'i vegnia a duvrar in curt temp enfin che tut funcziuneschia. «Nus vegnin a porscher ina carta cun tratgas a la moda da chasa, dasperas vegnin nus dentant er a resguardar influenzas e trends actuals. Jau vegn a cumprar products frestgs da la regiun en collavuraziun cun la mazlaria da Vrin, la chascharia da Lumbrein e cun il pasterner da Glion. Jau hai era l'intenziun da resguardar il label dal capricorn grischun en il café e las bavrondas.»