Da far ina revista da l'onn da tut las occurrenzas da chant en Surselva è nunpussaivel. Per quest artitgel ha RTR fatg ina selecziun. Qua vai en lingia directa tar las passaschas correspundentas:
- Passiun pretensiusa: Chor viril Lumnezia ha chantà «Ina passiun romontscha»
- Opera Viva giubilescha cun «Aïda»
- Il musical «Plaun Salter» a Danis
- Festival da la chanzun rumantscha
Passiun Rumantscha
Il Chor viril Lumnezia è sa deditgà la primavaira 2025 ad in project pretensius, numnadamain a la cumposiziun da Gion Antoni Derungs «Ina passiun romontscha». Quest opus 50 è naschì l'onn 1972 e po vegnir preschentà en differentas variantas, pli simplas e pli grevas. Il Chor viril Lumnezia ha preschentà avant Pasca la versiun originala e cunquai pretensiusa.
Instradà da preschentar «Ina passiun romontscha» 35 onns suenter la primaudiziun, ch'è stada il 1990, ha Retus Giger. Tranter auter er a chaschun dal 90avel anniversari che Gion Antoni Derungs avess pudì festivar quest onn.
In sguard davos las culissas
En ina pitschna seria ha il Telesguard dà in sguard davos las culissas da «Ina passiun romontscha» e purtretà las sfidas dal solist laic Silvio Collenberg sco er da l'organist da professiun Marcel Heini.
Guardar ina passiun tranter Nadal e Bumaun è magari nunusità. Tgi che na lascha betg disturbar po fufragnar en la registraziun cumpletta da RTR.
Dapli davart l'opus 50, davart il cumponist e davart la segunda preschentaziun insumma da quest'ovra pompusa datti en quest artitgel:
Opera Viva giubilescha cun Aïda
L'onn 2025 ha l'uniun Opera Viva festivà ses giubileum da 20 onns. A questa chaschun èsi stada d'udir la stad a Sursaissa l'opera «Aïda» cumponida da Giuseppe Verdi.
«Aïda» è ina da las pli enconuschentas operas ch'i dat. L'istorgia gioga en l'Egipta – ed i va per in'istorgia d'amur ed intrigas politicas. La princessa da l'Etiopia Aïda s'inamurescha en Radamès, in general egipzian. Cunquai ch'er Radamès è involvì en intrigas politicas stat Aïda tranter sia amur per Radamès e sia loialitad per sia patria.
Avais manchentà da visitar la preschentaziun en la tenda? Nagin problem, qua è l'entira registraziun pronta per guardar sin canapé.
Mamma e figlia amez l'Aïda
Ina da las finamiras da l'Opera Viva è da pussibilitar ad ina e scadin d'esser ina giada part d'ina opera. Il chor è numnadamain in ensemble da persunas laicas. Intginas èn gia dapi ditg da la partida, auters savuran per l'emprima giada l'aria d'in palc d'opera. Duas da questas novizas: Sandra Decurtins e sia figlia Paula che chantan uschiglio en il chor cecilian Trun.
RTR sin visita tar las ultimas emprovas da Aïda
Ina versiun curta da l'opera cun intgins highlights da l'Aïda ed ina u l'autra impressiun da Sandra e Paula Decurtins, ch'èn stadas part dal chor da l'Opera Viva 2025, pudais tadlar en l'«Artg musical».
Il musical Plaun Salter a Danis
La Compagnia Rossini, la famiglia Caduff ed in cor ad hoc – tut en tut èn radund 80 persunas stadas sin la tribuna a Danis per preschentar l'october il musical Plaun Salter. Cumponì e dirigì il musical ha Armin Caduff. Insumma, suenter «Frisal – Frisal» è er «Plaun Salter» stà in project da la famiglia Caduff. Ses figl Flurin Caduff è stà reschissur, actur e solist. Bab e figl han collavurà stretg per quest musical.
En il musical che Caduff ha scrit vai per la crappa a «Plaun Salter». En sia fantasia è quella plain cristals ed uschia fitg preziusa. Questa nova fa la runda e sveglia interess, na plascha però betg a tuts e chaschuna caos en vischnanca.
Er la figlia dal cumponist e dirigent, Maria Catrina Albin-Caduff è stada involvida fermamain per realisar il musical. Las lavurs da marketing, organisaziun e finanzas hajan gia cumenzà dus onns avant la preschentaziun, sco ella ha tradì en il Profil.
Festival da la chanzun rumantscha
Il terz Festival da la chanzun rumantscha ha carmalà l'entschatta october amaturas ed amaturs da chant a Vella. En il program hai dà insatge per tuttas vegliadetgnas. Var 1'500 persunas hajan visità l'occurrenza, uschia ils organisaturs.
Concurrenza da cumposiziun
Ina da las finamiras dal festival è da crear dapli chanzuns rumantschas. Tut en tut han 27 cumponistas e cumponists inoltrà 45 chanzuns novas. En la gallaria suandanta chattais las chanzuns victuras.
Las chanzuns victuras
Las chanzuns per chor viril, chor maschadà e chor da dunnas ha in chor ad hoc preschentà. Il chor d'uffants da Sumvitg ensemen cun la scola da chant da la Scola da musica Surselva han preschentà las chanzuns per chor d'uffants.
Igl è nunpussaivel da dar resposta, quai na vegn mai ad esser cler. I dat chanzuns simplas cun be intgins tacts ch'èn uschè grevas, ch'il simpel cuntegnia gia tut. Vulair far bain ina chanzun simpla è immens grev.
Suenter la concurrenza han ils organisaturs publitgà online las notas da las novas cumposiziuns. Sco il president da l'uniun Clau Scherrer ha ditg en l'Artg musical, èsi ina sfida da cumponer chanzuns simplas.
L'entira survista da la concurrenza da cumposiziun sco er impressiuns dal chant avert per uffants e famiglias e concerts da chantauturas e chantauturs, chattais en quest artitgel da bilantscha.