Ils responsabels da la plaiv da Tujetsch han relaschà il catechet per immediat da sias incumbensas per il rest da l’onn da scola 2025/26. Quai han communitgà il cassier e l’actuar en ina brev als geniturs dals 6 d’avrigl 2026. La decisiun saja crudada suenter ponderaziuns seriusas ed en concordanza cun il vicari general da l’uvestgieu da Cuira.
Entant ch’igl è vegnì chattà remplazzament per la preparaziun da l’emprima communiun e da la craisma, scroda per il mument l’instrucziun da religiun regulara.
Entant che la plaiv da Tujetsch n'ha betg vulì prender posiziun è l'uvestg da Cuira Joseph Maria Bonnemain stà pront da concretisar in pau quels «schabetgs».
Il cumportament dal catechet envers scolaras e scolars è vegnì crititgà.
Il cas e la critica pertutgia il cumportament dal catechet envers scolaras e scolars, metta l'uvestg da Cuira a lieu. Il catechet n'aveva nagin sensori per proximitad e distanza, sco er nagina maniera adequata da s'exprimer – er en chats.
Joseph Maria Bonnemain accentuescha dentant era ch'i n'haja dà nagin agir ch'avess giustifitgà ina denunzia tar las autoritads.
Quai èn las infurmaziuns las pli concretas che RTR ha survegnì en connex cun la relaschada a Tujetsch.
Catechet er en autras plaivs
Il catechet pertutgà n'ha betg be instruì a Tujetsch, mabain er en las plaivs da Trun, Glion ed Albula/Alvra. Tenor las persunas responsablas a Glion ed Alvra sajan ins cuntent cun sia lavur.
En il consorzi da scola Trun–Sumvitg saja er vegnì enconuschent in cas sumegliant. Quai haja manà a reacziuns e discussiuns.
Las mattas han ditg ch'il catechet na resguardia betg la distanza adattada ed haja era communitgà via Snapchat.
Il president da la plaiv da Sumvitg, Walter Deplazes, ha declerà la situaziun suandantamain: «Il november passà essan nus vegnids infurmads da la manadra da Giuventetgna Cadi che las mattas hajan ditg ch'il catechet na resguardia betg la distanza adattada durant l'ura religiusa ed haja era communitgà cun ina u l'autra dad ellas via Snapchat.»
Las persunas responsablas han, suenter avair infurmà il post responsabel da la baselgia catolica grischuna e l'uvestgieu da Cuira, dentant tschertgà il dialog cun ils uffants pertutgads ed il catechet, ha ditg Walter Deplazes, president da la plaiv da Sumvitg.
Suenter quests discurs saja la situaziun sa calmada, ina dispensaziun n’è stada nagin tema.
Reacziun adattada u surreacziun?
La plaiv da Tujetsch ha reagì cun mesiras pli severas che las plaivs a Trun e Sumvitg.
L'uvestg da Cuira, Joseph Maria Bonnemain, ha accentuà envers RTR che la responsabladad per decisiuns da quest gener saja tar las plaivs respectivas. Sin la dumonda da RTR, sche la plaiv da Tujetsch haja forsa surreagì, ha ditg l'uvestg Bonnemain ch'el chapeschia la plaiv e che lezza veglia reagir a moda segira sin reclamaziuns da geniturs.
Sch'ina plaiv vul prender serius reclamaziuns da geniturs, emprova ella dad ir la via segira. E quai poss jau er chapir.
El ha er accentuà che l'uvestgieu n'haja nagina toleranza per cumportament che cuntrafetschia a ses codex.
Il catechet sez n'ha betg vulì pigliar posiziun davant camera u microfon. En discurs cun RTR ha el dentant ditg che la tematica puncto distanza tar ils uffants saja, tenor el, sulettamain sa manifestà en las raits socialas ed er be per tgirar la relaziun – betg en stanza da scola.
Ultra da quai dettia anc autras tematicas da dispita tranter el e la plaiv da Tujetsch, dispitas che n'hajan da far nagut cun scolaras u scolars.
Davart sia dispensaziun n'ha il catechet betg vulì s'exprimer perquai ch'i saja in cas pendent.
Nagina instrucziun da religiun a Tujetsch
Sco consequenza directa da la dispensaziun scroda l’instrucziun da religiun regulara a partir dals 10 d’avrigl 2026. Ensemen cun la direcziun da la scola vul la plaiv ussa chattar ina soluziun per las lecziuns mancantas.
Per las preparativas impurtantas dal sacrament han ins dentant pudì engaschar persunas gia versadas: Uschi Cavegn surpiglia la preparaziun da l’emprima communiun e Hubert Venzin quella per la confirmaziun. Tuts dus hajan accumpagnà gia durant blers onns uffants e giuvenils en l’instrucziun da religiun.
La plaiv ha empermess d'infurmar ils geniturs uschè svelt sco pussaivel co proceder vinavant.