Suenter che la vischnanca da Mustér ha acceptà l'ovra solara Magriel ils 22 d'october 2023 ha er la regenza grischuna approvà il project l'entschatta 2025. L’ovra fotovoltaica vegn construida sut l’egida da l’Axpo.
Al pe da la Muota sper il territori da skis a Mustér sin 2100 meters sur mar ed ina surfatscha da 13,5 hectaras duai vegnir construì in implant cun ina prestaziun da radund nov megawatt uras. Cun quel èsi pussaivel da producir strusch 15 gigawatt uras energia electrica per onn. Quai correspunda al consum da radund 3'000 chasadas. L’energia duai star a disposiziun en emprima lingia al diever da las Pendicularas Mustér SA. Las colliaziuns a la rait d'electricitad ch'èn gia en il territori faciliteschan la realisaziun da quest implant. Sper l’Axpo èn er las Pendicularas Mustér SA participadas a l’Ovra solara Magriel SA.
Spetgar sin resultats
«Il mument essan nus anc en la fasa da studi dal sistem per l'indriz. Il terren fitg stip ed il vent èn ina sfida en quest territori, di Oliver Hugi, manader da Solar Svizra tar l'Axpo. Concret vul quai dir: Construir maisas cun moduls da fotovoltaica è strusch pussaivel en quest territori fitg stip. «Per quest motiv ans occupain nus il mument da la tecnica d’ina construcziun cun sugas. Questa tecnologia permetta da construir in implant fotovoltaic er en in lieu spundiv, declera Oliver Hugi. Questa tecnica vegnia gia applitgada en auters lieus, dentant betg en in territori alpin. «Da preschent vegn in implant cun questa construcziun examinà a Grimentz en il chantun Vallais», di Oliver Hugi.
Spetgar sin resultats
Il mument ch'ils resultats da l'implant da test a Grimentz èn avant maun sco er ulteriurs studis en connex cun l'ovra solara Magriel èn terminads, duai vegnir decidì definitivamain davart la construcziun da l'ovra. Sco Oliver Hugi di, è l’Axpo en stretg contact cun las Pendicularas Mustér SA e la vischnanca da Mustér en quest connex. L’Axpo realisescha il mument in ulteriur implant da fotovoltaica sisum la Surselva. Betg lunsch davent dal mir da fermada da Nalps en Val Tujetsch construescha ella in'ovra che producescha la finala energia electrica per radund 2'000 chasadas.
GEA a Magriel – NA a Run
L'onn 2023 èn il cussegl da vischnanca ed il suveran da Mustér sa fatschentads cun dus projects per implants fotovoltaics sin l'intschess da la vischnanca. Entant ch'il cussegl da vischnanca ha acceptà tant quai ch'era previs en il territori dal Run sco er quel a Magriel, ha il pievel prendì in'autra decisiun. El ha refusà quel a Run numnà «Solar Alpin Disentis», percunter acceptà cleramain quel a Magriel.