Il parlament da Glion ha gì sia davosa sesida da la legislatura 2022-2025. Il redactur da RTR en Surselva, Reto Pfister dat in sguard enavos sin la legislatura, ed analisescha daco ch'igl è anc adina ina sfida per il parlament d'approvar il preventiv – malgrà ch'i dat ina cumissiun preliminara per questa tractanda.
Reto Pfister, poss ti resumar tge ch'è succedì mesemna saira a la sesida dal parlament a Glion?
La sesida dal parlament ha gì ina glista da tractandas pauc spectaculara. Ils temas principals eran il preventiv, la fixaziun dal pe da taglia e la cumpra dal provediment d'aua cun ina ovra electrica da las soras dominicanas – in project ch'era gia vegnì decidì avant in onn.
Mes plan da temp per la sesida era da las 18:00 fin las 20:30, ma la realitad è stada in'autra. La sesida n'è puspè ina giada betg ida tenor il plan, ed jau sun turnà en biro pir suenter las 23.00. La debatta davart il preventiv ha revelà in problem fundamental: il parlament na para betg da chapir sia atgna rolla. Cun auters pleds, i sa mussa che blers parlamentaris na chapeschan betg co la politica funcziunescha en la pratica. Questa mancanza da chapientscha per las rollas e las proceduras politicas han manà ad ina debatta ineffizienta e prolungada.
Quai tuna ussa vaira dir, poss ti dar exempels co ti vegns a questa conclusiun?
Las debattas da preventiv èn adina lungas. I dat sesidas legendaras. Uschia hai dà avant intgins onns ina sesida da preventiv ch'ha durà fin lunsch suenter mesanotg. Per evitar questas situaziuns ha il parlament creà ina cumissiun da finanzas che prepara la fatschenta per il parlament. Quai avess gì da far vegnir pli effizienta la tractanda en il parlament, quai che n'è però insumma betg reussì. Il problem principal è che quellas persunas che crititgavan avant il preventiv en il parlament, sesan ussa en la cumissiun da finanzas.
Co ans stuain nus imaginar ina tala sesida da preventiv en il parlament da Glion?
Il preventiv da la vischnanca da Glion mussa in quint da manaschi da 38 milliuns francs, ed in quint d'investiziuns d'enturn tschintg milliuns netto. La proposta da la suprastanza per il quint era equilibrada cun in plus da 90'000 francs, ma la cumissiun da finanzas ha proponì ina correctura che maina ad in plus da 450'000 francs.
Reto Pfister
Producent Surselva / GR Central
Il preventiv furma en sasez il rom nua ch'il parlament avess da metter las lingias grossas, pia la direcziun. Enstagl da far quai curregia il parlament detagls en ils differents secturs – ed agescha uschia operativamain cun curreger summas minimalas. Exempels èn: la discussiun davart 1'300 francs per la biblioteca, 1'300 francs per in fotoshooting da la scola da talents u 3'900 francs per spargnar palpiri da copiar en l'administraziun communala. Uschia sa maschaida il parlament extrem en la funcziun operativa.
En total ha la cumissiun da finanzas inoltrà 23 propostas da midada per il quint current e sis per il quint d'investiziuns. En l'emprima sesida da preparaziun tranter la cumissiun da finanzas e la suprastanza communala eran quai schizunt stadas 180 propostas, per part da be 200 francs. En il quint da manaschi ha il parlament approvà tut las propostas da la cumissiun da finanzas. Tar il quint d'investiziun hai la finala dà in zic resistenza, cura ch'il parlament ha ditg Gea a trais projects ch'eran gia vegnids stgatschads pliras giadas en il passà.
Vulain anc dar in'egliada sin la davosa legislatura, pia sin ils davos quatter onns politics a Glion. Co giuditgeschas ti il svilup da la vischnanca da Glion?
Quai ch'ha midà è il tun da discussiun. Era quel pli baud per part detg dad aut, èn las discussiuns ussa pli moderadas. Quai che n'ha betg midà è la disfidanza dal parlament envers la suprastanza ed envers l'administraziun. I n'ha dà nagin svilup en quest grà durant quels quatter onns, ma era betg ils davos 12 onns. Era sch'ils parlamentaris e las parlamentarias ed il president communal menziunan che la collavuraziun saja buna ed engrazian qua e là per la buna collavuraziun tranter ils gremis, è tenor mia valitaziun la situaziun uschia che la vischnanca na vegn betg giu dal flatg.
Il problem principal è sco ditg: il parlament na sa betg tge ch'è sia rolla e sa maschaida en l'operativa e la suprastanza communala na vegn betg da tegnair pitg a quai. Il parlament fa savens quai che la cumissiun da quint e gestiun avess da far. Perquai che la medema glieud sesa en quels dus gremis vegnan las incumbensas maschadadas.
Mia resumaziun finala è: Glion fa bain massa studis e concepts, per la gronda visiun manca dentant il curaschi. Uschia vegn jau tar la conclusiun che la vischnanca da Glion na perdess il mument nagut sch'ella aboliss ses parlament communal.